ഉപരാഷ്ട്രപതി ജഗ്ദീപ് ധന്‍കർ മമതയെ വിറപ്പിച്ച കർഷക പുത്രൻ

മമതയോട് കൊമ്പുകോര്‍ത്ത് വാര്‍ത്തകളില്‍ നിറഞ്ഞിരുന്ന ബംഗാള്‍ ഗവര്‍ണര്‍ ജഗ്ദീപ് ധന്‍കർ ഇന്ത്യയുടെ ഉപരാഷ്ട്രപതിയായി. കര്‍ഷകന്റെ മകന്‍ എന്ന – ‘കിസാന്‍ പുത്ര’ എന്നാണ് ജഗ്ദീപ് ധന്‍കറിനെ ഉപരാഷ്ട്രപതി സ്ഥാനാര്‍ത്ഥിയായി പ്രഖ്യാപിച്ചുകൊണ്ട് പ്രധാനമന്ത്രി നരേന്ദ്ര മോദി വിശേഷിപ്പിച്ചിരുന്നത്.

കാര്‍ഷിക നിയമ ഭേദഗതിയും അതിനുപിന്നാലെ ഉയര്‍ന്നുവന്ന കര്‍ഷക പ്രക്ഷോഭവും ഉത്തര്‍പ്രദേശ്, രാജസ്ഥാന്‍, മധ്യപ്രദേശ് സംസ്ഥാനങ്ങളിലെ പ്രബല വോട്ട് ബാങ്കായ ഹിന്ദുജാട്ട് സമുദായത്തെ പാര്‍ട്ടിയില്‍ നിന്നകറ്റിയെന്ന കണക്കുകൂട്ടലുകള്‍ തകർത്തെറിഞ്ഞു ജാട്ട് വിഭാഗക്കാരനും തീർത്തും മോദി അനുഭാവിയുമായ ജഗ്ദീപ് ധന്‍കറിനെ ബിജെപി ഉപരാഷ്ട്രപതിയുടെ പരമോന്നത കസേരയിൽ എത്തിച്ചിരിക്കുകയാണ് എന്നു വേണം പറയാൻ.

രാജസ്ഥാനിലെ കിതാന്‍ എന്ന ചെറുഗ്രാമത്തില്‍ 1958 മെയ് 18 ൽ ഗോകുല്‍ ചന്ദ് – കേസരി ദേവി ദമ്പതികളുടെ മകനായി ജനിച്ച ജഗ്ദീപ് ചിറ്റോര്‍ഗഢിലെ സൈനിക സ്‌കൂളില്‍ നിന്നാണ് പ്രാഥമിക വിദ്യാഭ്യാസം പൂർത്തിയാക്കുന്നത്. രാജസ്ഥാന്‍ സര്‍വകലാശാലയില്‍നിന്ന് തുടർന്ന് ബിഎസ്‌സി ഫിസിക്‌സ്, എല്‍എല്‍ബി ബിരുദങ്ങള്‍ നേടി. രാജസ്ഥാന്‍ ഹൈക്കോടതിയിലും സുപ്രീം കോടതിയിലും തുടർന്നദ്ദേഹം അഭിഭാഷകനായിരുന്നു. ജനതാദളിലൂടെ രാഷ്ട്രീയ പ്രവേശനം നടത്തിയ ജഗ്ദീപ്, പിന്നീട് കോണ്‍ഗ്രസ് വഴി ബിജെപിയിലെത്തി.1989ല്‍ ആയിരുന്നു ആദ്യ തെരഞ്ഞെടുപ്പ് വിജയം. കോണ്‍ഗ്രസ് കോട്ടയായിരുന്ന ജുന്‍ജുനില്‍നിന്ന് ജനതാദള്‍ ടിക്കറ്റില്‍ ലോക്‌സഭയിലെത്തിയ അദ്ദേഹം,1990ല്‍ ചന്ദ്രശേഖര്‍ സര്‍ക്കാരില്‍ പാര്‍ലമെന്റിറികാര്യ മന്ത്രിയായിരുന്നു.

1993ലെ രാജസ്ഥാന്‍ നിയമസഭാ തെരഞ്ഞെടുപ്പില്‍ കിഷന്‍ഗഢില്‍നിന്ന് വിജയിച്ച് എംഎല്‍എ ആയി. 2003ല്‍ ബിജെപിയിലെത്തിയ ജഗ്ദീപ് ബിജെപിയുടെ സംസ്ഥാന, ദേശീയ തെരഞ്ഞെടുപ്പു കാര്യങ്ങളില്‍ പ്രധാനസ്ഥാനങ്ങള്‍ കൈകാര്യം ചെയ്തു. 2019ല്‍ കേസരീനാഥ് ത്രിപാഠിയുടെ പിന്‍ഗാമിയായാണ് ധന്‍കര്‍ ബംഗാള്‍ ഗവര്‍ണര്‍സ്ഥാനത്തെത്തുന്നത്.

ഗവര്‍ണര്‍ ആയതിൽ പിന്നെ മുഖ്യമന്ത്രി മമത ബാനര്‍ജിയുമായി നിരന്തരം കൊമ്പുകോര്‍ത്തിരുന്ന ധന്‍കർ രാജ്യത്താകെ ശ്രദ്ധ നേടുകയായിരുന്നു. സാമൂഹ്യ മാധ്യമങ്ങളിലും പൊതു വേദികളിലും മമതക്കെതിരെ മമതയുടെ തെറ്റായ ചെയ്തികൾക്കെതിരെ ധന്‍കർ കണ്ണുമടച്ച് നിലപാടുകൾ എടുത്തു. സര്‍ക്കാര്‍ നിയമനങ്ങള്‍, രാഷ്ട്രീയ സംഘര്‍ഷങ്ങള്‍, ക്രമസമാധാനം തുടങ്ങിയ കാര്യങ്ങളിൽ ഒന്നിനു പുറകേ ഒന്നായി ധന്‍കർ ദീദിക്കെതിരെ ശക്തമായ നിലപാടുകൾ എടുത്തു. മമതയെ ടാഗ് ചെയ്തുകൊണ്ടുള്ള ധന്‍കറിന്റെ ട്വീറ്റുകള്‍ ദേശീയ ശ്രദ്ധ തന്നെ നേടിയിരുന്നു. ഒടുവില്‍ ‘പൊറുതിമുട്ടിയ’ മമത ധന്‍കറിനെ ബ്ലോക്ക് ചെയ്യുന്ന സ്ഥിതിവിശേഷം വരെ ഉണ്ടായി.

ധന്‍കര്‍ ബിജെപി ഏജന്റാണെന്നും സംസ്ഥാന സര്‍ക്കാരിനെ അസ്ഥിരപ്പെടുത്താനും ഫെഡറല്‍ സംവിധാനം തകര്‍ക്കാനും നരേന്ദ്ര മോദി പറഞ്ഞയച്ചതാണെന്നും വരെ പറഞ്ഞ മമത പ്രതിപക്ഷത്തിന്റെ ഉപരാഷ്ട്രപതി സ്ഥാനാര്‍ത്ഥി മാര്‍ഗരറ്റ് ആല്‍വയെ പിന്തുണയ്ക്കാതെ മാറി നിൽക്കുന്നതാണ് രാജ്യം പിന്നീട് കണ്ടത്. ബംഗാളില്‍ ദീദിയെ വെള്ളം കുടിപ്പിച്ച മോദിയുടെ വിശ്വസ്തന്‍ ഉപരാഷ്ട്രപതിയായി തെരഞ്ഞെടുക്കപ്പെട്ടപ്പോൾ, ബിജെപി ലക്ഷ്യം വയ്ക്കുന്നത് വരുന്ന രാജസ്ഥാന്‍ തെരഞ്ഞെടുപ്പ് കൂടിയാണെന്നതാണ് യാഥാർഥ്യം. ദീദിയോട് കലഹിച്ച അതേ വീര്യത്തോടെ ധന്‍കര്‍ രാജ്യസഭ അധ്യക്ഷ സ്ഥാനത്തെത്തിയിരിക്കെ, പ്രതിപക്ഷത്തിന്റെ കടന്നാക്രമണങ്ങളെ ചെറുക്കാന്‍ ബിജെപിക്ക് ഇനി ധന്‍കര്‍ മാത്രം മതിയെന്നതും ഒരു സത്യം.