ബഫർ സോൺ വിഷയത്തിൽ ​ഗവർണർ ഇടപെടും

തിരുവന്തപുരം. ബഫർ സോൺ വിഷയത്തിൽ ​ഗവർണർ ആരിഫ് മുഹമ്മദ് ഖാൻ ഇടപെടും. ബഫർ സോൺ വിഷയത്തിൽ പരാതി വന്നാൽ ഉറപ്പായും താൻ പരിശോധിക്കുമെന്ന് ​ഗവർണർ വ്യക്തമാക്കിയിരിക്കുകയാണ്. നിലവിൽ കർഷകരുടെ നിവേദനമൊന്നും ലഭിച്ചില്ല. വിഷയത്തിൽ നിയമ ലംഘനം ഉണ്ടായാൽ ഉറപ്പായും പരിശോധിക്കും – ആരിഫ് മുഹമ്മദ് ഖാൻ മാധ്യമങ്ങളോട് പറയുകയുണ്ടായി.

മന്ത്രിമാരുടെ പേഴ്‌സണൽ സ്റ്റാഫുകളിലെ രാഷ്‌ട്രീയ നിയമനങ്ങളിലും സർവ്വകലാശാലകളിലെ അനധികൃത നിയമനങ്ങളിലും സർക്കാരുമായി തുറന്ന പോരിലേർപ്പെട്ട ഗവർണർക്ക് വലിയ പിന്തുണയാണ് പൊതുസമൂഹത്തിൽ നിന്ന് ഇതിനകം ലഭിച്ചത്. ഇതിന് പിറകെയാണ് സംസ്ഥാനത്ത് വലിയ പ്രതിഷേധമുയർന്നുകൊണ്ടിരിക്കുന്ന ബഫർസോൺ വിഷയത്തിലും ജനങ്ങളുടെ ആശങ്കകൾ പരിഗണിക്കുമെന്ന് ആരിഫ് മുഹമ്മദ് ഖാൻ വ്യക്തമാക്കിയിട്ടുള്ളത്.

അതേസമയം, ബഫർ സോൺ വിഷയത്തിൽ തുടർനടപടികൾ സ്വീകരിക്കാൻ മുഖ്യമന്ത്രി വിളിച്ച ഉന്നതതലയോഗം ചൊവ്വാഴ്ച നടക്കുന്നുണ്ട്.
സർക്കാർ നിയോഗിച്ച വിദഗ്ധ സമിതി യോഗവും നടക്കുന്നുണ്ട്. ഉപഗ്രഹ സർവേ റിപ്പോർട്ടിൽ പരാതി നൽകാനുള്ള സമയ പരിധി നീട്ടുന്നതിനെ കുറിച്ചാണ് മുഖ്യ ചർച്ച. ഇടുക്കി ജില്ലയിൽ ബഫർസോൺ ഉപഗ്രഹ സർവേയിലെ അപാകത കണ്ടെത്താൻ വില്ലേജ് ഓഫീസർമാരുടെ നേതൃത്വത്തിലുള്ള പരിശോധന തുടങ്ങിയിട്ടുണ്ട്. വന അതിർത്തിയോട് ചേർന്നുള്ള പ്രദേശങ്ങളാണോ, സംരക്ഷിത വനമേഖലയുടെ അതിർത്തിയാണോ, ജനസാന്ദ്രത കൂടിയ പ്രദേശമാണോ മാപ്പിൽ രേഖപ്പെടുത്തിയിരിക്കുന്ന സർവേ നമ്പരുകൾ എന്നാണ് പരിശോധിക്കുന്നത്..