മകനെ ശരീരത്തോട് ചേർത്ത് കെട്ടി അമ്മ പുഴയിൽ ചാടി ജീവനൊടുക്കി.

തൃശൂര്‍. മകനെ ശരീരത്തോട് ചേർത്ത് കെട്ടി അമ്മ പുഴയിൽ ചാടി ജീവനൊടുക്കി. കേച്ചേരി ചിറനെല്ലൂര്‍ കൂമ്പുഴ പാലത്തിന് സമീപം പുഴയില്‍ അമ്മയുടെയും കുഞ്ഞിന്റെയും മൃതദേഹം കണ്ടെത്തുകയായിരുന്നു. ചിറനെല്ലൂര്‍ സ്വദേശിനി ഹസ്‌നയുടെയും നാലരവയസുകാരന്റെയും മൃതദേഹമാണ് കണ്ടെടുത്തത്. മകനെ ഹസ്‌ന എന്ന യുവതി ദേഹത്തോട് ചേര്‍ത്ത് കെട്ടി പുഴയില്‍ ചാടുകയായിരുന്നു.

ചൊവ്വാഴ്ച രാവിലെ പത്തരയോടെയാണ് ഹസ്‌ന മകനോടൊപ്പം വീട്ടില്‍ നിന്ന് ഇറങ്ങിയത്. മാതാവിനോട് അങ്കണവാടിയിലേക്കെന്ന് പറഞ്ഞാണ് വീട്ടില്‍ നിന്നും പുറത്തിറങ്ങിയത്. ഇതിനിടെ കുഞ്ഞുമായി ഒരു സ്ത്രീ പുഴയില്‍ ചാടിയെന്ന് വാര്‍ത്ത പരന്നു. ഈ സമയത്ത് ഹസ്‌നയുടെ മാതാവ് അങ്കണവാടിയില്‍ വിളിച്ചുചോദിച്ചപ്പോള്‍ അവിടെ എത്തിയിട്ടില്ലെന്ന് അറിയാന്‍ കഴിഞ്ഞു.

പതിനൊന്ന് മണിയോടെയാണ് ഇവരുടെ മൃതദേഹം പുഴയിൽ കണ്ടെത്തുന്നത്. മരിച്ചത് ഹസ്‌നയും കുഞ്ഞുമാണെന്ന് മാതാവ് തിരിച്ചറിഞ്ഞിട്ടുണ്ട്. നാലുവയസുകാരന് സംസാരിക്കാന്‍ ബുദ്ധിമുട്ടും കേള്‍വി ശേഷിക്കുറവും ഉണ്ടായിരുന്നതായി അയല്‍വാസികള്‍ പറഞ്ഞു. എന്നാല്‍ ഇവരെ ആത്മഹത്യയിലേക്ക് നയിച്ച കാരണം എന്തെന്ന് വ്യക്തമല്ല.