വാഹന പരിശോധനയ്ക്കിടെ ഗർഭിണിയെയും ഭർത്താവിനെയും പൊലീസ് അപമാനിച്ചു.

തിരുവനന്തപുരം. വാഹന പരിശോധനയ്ക്കിടെ ഗർഭിണിയെയും ഭർത്താവിനെയും പൊലീസ് അപമാനിച്ചു. ചൊവ്വാഴ്ച വൈകിട്ട് കിഴക്കേകോട്ട താലൂക്ക് ഓഫീസിന് സമീപത്ത് വെച്ചായിരുന്നു സംഭവം. കിഴക്കേകോട്ടയിൽ ഡ്യൂട്ടിയിലുണ്ടായിരുന്ന ട്രാഫിക് സൗത്ത് യൂണിറ്റിലെ എസ് ഐക്ക് എതിരെ നെടുമങ്ങാട് സ്വദേശികളായ ദമ്പതികൾ പരാതി നൽകിയിരിക്കുകയാണ്.

ഇരുചക്രവാഹനത്തിൽ സഞ്ചരിക്കുകയായിരുന്ന നെടുമങ്ങാട് കരിക്കുഴി സ്വദേശി വിജിത്തും ഭാര്യയെയും താലൂക്ക് ഓഫീസിന് സമീപത്തുനിന്ന് മണക്കാട് റോഡിലേയ്ക്ക് പ്രവേശിക്കും മുൻപ് പൊലീസ് തടഞ്ഞു. പിന്നാലെ ഇത് വൺവേയാണെന്നും നിയമം ലംഘിച്ചതിനാൽ 1000 രൂപ പിഴയടയ്ക്കണമെന്നും എസ് ഐ ആവശ്യപ്പെടുകയുണ്ടായി.

വൺവേയാണെന്ന് അറിയാതെ റോഡിലേയ്ക്ക് കയറിയതാണെന്ന് വിജിത്ത് പൊലീസിനോട് മറുപടി പറഞ്ഞു. കൈയിൽ പണമില്ലാത്തതിനാൽ തുക കോടതിയിൽ കെട്ടിവയ്ക്കാമെന്നും അറിയിക്കുകയുണ്ടായി. എന്നാൽ പൊലീസുകാർ ഇതിന് വഴങ്ങിയില്ല. ഇരുവരെയും പിടിച്ചുനിർത്തുകയാണ് ചെയ്തത് – പരാതിയിൽ പറഞ്ഞിരിക്കുന്നു.
‘
ഭാര്യ ഗർഭിണിയാണെന്ന് അറിയിച്ചിട്ടും പൊലീസ് വിട്ടയയ്ക്കാൻ കൂട്ടാക്കിയില്ലെന്നു വിജിത്ത് പരാതിയിൽ വ്യക്തമാക്കുന്നുണ്ട്. ‘ഇവൾ ഗർഭിണിയായിട്ടാണോ ജീൻസും വലിച്ചുകേറ്റി ചുണ്ടിൽ ചായവും പൂശി നടക്കുന്നതെന്ന് എസ് ഐ’ പറഞ്ഞതായും പരാതിയിൽ ചൂണ്ടിക്കായിരിക്കുന്നു. എസ് ഐ അപമര്യാദയായി പെരുമാറിയെന്ന് കാട്ടി വിജിത്തും ഭാര്യയും മുഖ്യമന്ത്രിക്കും ഡി ജി പിയ്ക്കും ഇമെയിൽ വഴി പരാതി നൽകിയിട്ടുണ്ട്.