എസ് ഐ യുടെ മകൻ അതിഥി തൊഴിലാളികളെ ഉപയോഗിച്ച് കൊച്ചിയിലേക്ക് 28 കിലോ കഞ്ചാവ് കടത്തി, എസ് ഐ അറസ്റ്റിലായി

കൊച്ചി . അതിഥി തൊഴിലാളികളെ ഉപയോഗിച്ച് കൊച്ചിയിലേക്ക് കഞ്ചാവ് കടത്തിയ സംഭവത്തിലെ മുഖ്യ സൂത്രധാരകൻ കേരള പോലിസിലെ ഒരു എസ് ഐ യുടെ മകൻ. 28 കിലോ കഞ്ചാവ് പിടിച്ച കേസിൽ ഗ്രേഡ് എസ് ഐ കൂടി ഇപ്പോൾ അറസ്റ്റിലായിരിക്കുകയാണ്. ആലുവയിലാണ് സംഭവം. കഞ്ചാവ് ഒഡിഷ സ്വദേശികളിൽ നിന്ന് പിടിയിലായതോടെ തടിയിട്ടപ്പറമ്പ് ഗ്രേഡ് എസ്ഐ സാജന്റെ മകൻ നവീൻ കേസിൽ പ്രതിയാവുകയായിരുന്നു.

കഞ്ചാവ് കേസിൽ ഗ്രേഡ് എസ് ഐ ഉൾപ്പെടെ നാല് പേർ ആണ് അറസ്റ്റിലായിരിക്കുന്നത്. മകന്റെ തേതൃത്വത്തിലുള്ള ലഹരി മാഫിയക്ക് സർവ്വ സഹായങ്ങളും എസ് ഐ ചെയ്തു വരുകയായിരുന്നു. വാഴക്കുളം എഴിപ്രം ഉറുമത്ത് വീട്ടിൽ നവീൻ (21) ഇയാളുടെ അച്ഛൻ സാജൻ (56), അറയ്ക്കപ്പടി വെങ്ങോല ഒളിയ്ക്കൽ വീട്ടിൽ ആൻസ് (22), പെരുമ്പാവൂർ വട്ടയ്ക്കാട്ടുപടി ഈച്ചരമറ്റു കണ്ടം ബേസിൽ തോമസ് (22) എന്നിവരെയാണ് ആലുവ പോലീസ് പിടികൂടിയത്.

കേസിൽ പ്രതിയായ മകനെ എങ്ങനെയും രക്ഷിക്കാനുള്ള നെട്ടോട്ടത്തിനിടെ എസ് ഐ ഇപ്പോൾ കുടുങ്ങിയിരിക്കുകയാണ്. കഞ്ചാവ് കേസിൽ പ്രതിയായ മകനെ വിദേശത്തേക്ക് കടക്കാൻ ഇതിനിടെ എസ് ഐ സഹായിച്ചു. ഈ സംഭവത്തിനാണ് തടിയിട്ടപ്പറമ്പ് ഗ്രേഡ് എസ്ഐ സാജനേ പോലീസ് അറസ്റ്റ് ചെയ്തിരിക്കുന്നത്. സാജനെയാണ് ആലുവ പൊലീസ് ആണ് അറസ്റ്റ് ചെയ്തത്. ഈ മാസം സർവ്വീസിൽ നിന്ന് റിട്ടയർ ചെയ്യാനിരിക്കെയാണ് അറസ്റ്റ് എന്നതാണ് ശ്രദ്ധേയം.

28 കിലോ കഞ്ചാവുമായി കഴിഞ്ഞയാഴ്ചയാണ് ഒഡിഷ സ്വദേശികൾ അറസ്റ്റിലാവുന്നത്. പൊലീസ് അന്വേഷണത്തിൽ ഇവർ ആലുവ സ്വദേശികൾക്കായാണ് കഞ്ചാവ് എത്തിക്കുന്നതെന്ന് കണ്ടെത്തിയിരുന്നു. തുടരന്വേഷണത്തിൽ പ്രതി എസ്ഐയുടെ മകനാണെന്നും കണ്ടെത്തി. സാജന്റെ മകൻ നവീൻ ഇതിനോടകം വിദേശത്തേക്ക് കടക്കുകയും ചെയ്തിരുന്നു.