എ.സി. കോച്ചിൽനിന്ന് പുതപ്പും തലയണ ഉറയും മോഷ്ടിച്ചു, യാത്രക്കാരൻ പരിശോധനയ്ക്കിടെ കുടുങ്ങി

കണ്ണൂർ : ട്രെയിൻ യാത്രകഴിഞ്ഞ് കണ്ണൂരിൽ ഇറങ്ങിയയാളുടെ ബാഗിൽനിന്നാണ് നാല് പുതപ്പും രണ്ട് തലയണയുറയും തീവണ്ടിയിലെ ബെഡ്‌റോൾ ജീവനക്കാർ കണ്ടെത്തി. തീവണ്ടി എ.സി. കോച്ചിൽനിന്ന് പുതപ്പും തലയണ ഉറയും മോഷ്ടിച്ച യുവാവാണ് കുടുങ്ങിയത്. തിരുവനന്തപുരം-മംഗളൂരു മലബാർ എക്സ്പ്രസിൽ എത്തിയതായിരുന്നു ഇയാൾ.

മലബാർ എക്സ്പ്രസ് ഉൾപ്പെടെ മംഗളൂരു ഡിപ്പോയിൽനിന്നുള്ള അഞ്ച് തീവണ്ടികളിൽ മാത്രം ഒരുമാസം ശരാശരി 60 പുതപ്പുകളും 30-ലധികം തലയണയുമാണ് നഷ്ടമാകുന്നത്. മോഷണം കൂടിയതിനാൽ പല വണ്ടികളിലും ഇപ്പോൾ ത്രീ ടയർ എ.സി. കോച്ചിൽ ടവ്വൽ നൽകാറില്ല.

ഇത്തരത്തിൽ മോഷണങ്ങൾ നടക്കുമ്പോൾ ബെഡ്‌റോൾ കരാർ ജീവനക്കാരുടെ കൈയിൽനിന്നാണ് ഏജൻസി നഷ്ടപ്പെട്ട തുക പിടിക്കുന്നത്. തേർഡ് എ.സി., സെക്കൻഡ് എ.സി.യിലെ യാത്രക്കാരുടെ ‘ടിപ്പ് ടോപ്പ്’ വേഷം ഇവരാരും ഇത്തരമൊരു പ്രവർത്തി ചെയ്യുമെന്ന് ചിന്തിക്കാനാകില്ല. എന്നാൽ പലരും പോകുമ്പോൾ തലയണ ഉറ വരെ കൊണ്ടുപോകുന്നു എന്നതാണ് വാസ്തവം.