‘പര്‍ദയിട്ട് മുഖം മറച്ച് നവോദ്ധാനം നടപ്പിലാക്കിയ പിണറായി വിജയന് ഈ പോസ്റ്റ് സമർപ്പിക്കുന്നു, മരുമോൻ കാണേണ്ട പോസ്റ്റ് മുക്കേണ്ടിവരും.. ടീച്ചറെ’..

മുന്‍ ആരോഗ്യമന്ത്രി കെകെ ശൈലജയുടെ ഫേസ്ബുക്ക് പോസ്റ്റ് വൈറലായിരി ക്കുകയാണ്. സൗദിയുടെ ആദ്യ വനിതാ ബഹിരാകാശ സഞ്ചാരിയും സ്തനാർബുദ ഗവേഷകയുമായ റയ്യാന ബര്‍നാവിയെ പ്രശംസിച്ചു കൊണ്ട് കെകെ ശൈലജ ഫേസ്ബുക്കിലിട്ട പോസ്റ്റാണ് ഇപ്പോൾ സൈബറിടത്തിൽ വൈറലായിട്ടുള്ളത്. റയ്യാന ബര്‍നാവിയുടെ ചിത്രത്തോടൊപ്പമാണ് ആശംസാകുറിപ്പ് കെകെ ശൈലജ പങ്കുവെച്ചിരിക്കുന്നത്.

‘സങ്കുചിത മതചിന്തകളിലൂന്നി സ്ത്രീകളുടെ സ്വതന്ത്ര ചിന്തകളേയും അവകാശങ്ങളേയുമാകെ ഹനിക്കുന്ന ഒരു വിഭാഗത്തിനുള്ള മറുപടി കൂടിയാണ് ഈ ബഹിരാകാശ ദൗത്യം’ എന്ന് പറഞ്ഞാണ് ശൈലജ ടീച്ചർ ഫേസ്ബുക്ക് പോസ്റ്റ് അവസാനിപ്പിച്ചിരിക്കുന്നത്. ഈ വരികളാണ് ഇപ്പോൾ സൈബറിടത്തിലെ ചര്‍ച്ച.

ശൈലജയുടെ പോസ്റ്റിനെ അനുകൂലിച്ചും വിമര്‍ശിച്ചും നിരവധി പേർ പോസ്റ്റിന് താഴെ കമന്റുമായി രംഗത്തെത്തിയിട്ടുണ്ട്. പര്‍ദയിട്ട് മുഖം മറച്ച് നവോദ്ധാനം നടപ്പിലാക്കിയ പിണറായി വിജയന് ഈ പോസ്റ്റ് സമർപ്പിക്കുന്നു, മരുമോൻ കാണേണ്ട പോസ്റ്റ് മുക്കേണ്ടിവരും, ടീച്ചറെ നിങ്ങൾ സങ്കിയായിരുന്നോ, എപ്പോഴാണ് പോസ്റ്റ് മുക്കുന്നത്, തുടങ്ങി ഒട്ടേറെ കമന്റുകളാണ് പോസ്റ്റിന് താഴെ വന്നിരിക്കുന്നത്. 50 ശതമാനം സ്ത്രീ പ്രാതിനിധ്യം പോലും ഉറപ്പിക്കാൻ കഴിയാത്ത കമ്മ്യൂണിസ്റ്റ് പാര്‍ട്ടിയുടെ മുഖത്തടിക്കുന്ന മറുപടി എന്നും, ആദ്യം സ്വന്തം പാര്‍ട്ടിയിൽ സ്ത്രീ പ്രാതിനിധ്യം നടപ്പിലാക്കു എന്നും തുടങ്ങി കമന്റുകൾ നിറയുകയാണ്.