ഇക്കുറി റിപ്പബ്ലിക് ദിന പരേഡിന് സർപ്രൈസ് ഒരുക്കി കേന്ദ്ര സർക്കാർ

രാജ്യത്ത് വി ഐ പി സംസ്‌കാരം ഒഴിവാക്കാനുള്ള സുപ്രധാന നീക്കങ്ങളുമായി കേന്ദ്ര സർക്കാർ. പ്രധാനമന്ത്രി നരേന്ദ്ര മോദിയുടെ മാതാവ് അടുത്തിടെ അന്തരിച്ചപ്പോഴും ചടങ്ങുകൾ ബന്ധുക്കളിൽ മാത്രം ഒതുക്കി ലളിതമായിട്ടാണ് നടത്തിയിരുന്നത്. ഇത് രാജ്യത്ത് ഏറെ ചർച്ചയായി. വരുന്ന റിപ്പബ്ലിക് ദിന പരേഡിലും വി ഐ പി സംസ്‌കാരത്തെ കയ്യകലത്തിൽ നിർത്താനാണ് കേന്ദ്ര സർക്കാർ തീരുമാനിച്ചി രിക്കുന്നത്. ഇതിനായി 2023 റിപ്പബ്ലിക് ദിന പരേഡ് കാണാനെത്തുവർക്കുള്ള ഇരിപ്പിടത്തിൽ മുൻ നിര റിക്ഷാ വലിക്കുന്നവർക്കും തെരുവ് കച്ചവടക്കാർക്കും, ശുചീകരണ തൊഴിലാളികൾക്കും ഇടം ഒഴിച്ചിടും.

വി വി ഐ പികളും, വി ഐ പികളുമാണ് സാധാരണയായി ഇത്തരം പരിപാടികളിൽ മുൻനിരയിൽ സ്ഥാനം പിടിക്കാറുള്ളത്. പലപ്പോഴും മുൻപിൽ സീറ്റ് ലഭിച്ചില്ലെന്ന പരാതികൾ പ്രമുഖർ ഉയർത്തുന്നതും പതിവാണ്. ഇതിന് അന്ത്യം കുറിച്ചുകൊണ്ടാണ് 2023 റിപ്പബ്ലിക് ദിന പരേഡിൽ രാജ്യത്തെ സാധാരണക്കാർക്ക് മുൻനിരയിൽ ഇരിപ്പിടം ഒരുക്കുന്നത്. പുതിയ പാർലമെന്റ് സമുച്ചയമായ സെൻട്രൽ വിസ്റ്റ പ്രോജക്ടിൽ ജോലി ചെയ്യുന്ന തൊഴിലാളികൾക്കും മുൻനിരയിലാവും സീറ്റ്. ഇവരെയെല്ലാം പ്രത്യേക ക്ഷണിതാക്കളായാണ് കൊണ്ടുവരുന്നതെന്ന് പ്രതിരോധ മന്ത്രാലയം ബുധനാഴ്ച അറിയിച്ചിട്ടുണ്ട്. ഈ വർഷം 45,000 സീറ്റുകളാണ് പരേഡിനായി ഒരുക്കിയിരിക്കുന്നത്.

പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സർക്കാർ സർക്കാർ പരിപാടികളിൽ സാധാരണക്കാരുടെ പങ്കാളിത്തം വിപുലപ്പെടുത്തുന്നതിന് കഴിഞ്ഞ വർഷങ്ങളിൽ സുപ്രധാനമായ നടപടികൾ സ്വീകരിച്ചുവരികയാണ്. രാജ്യത്തിന്റെ മിക്കയിടങ്ങളിലും പ്രധാന പദ്ധതികളുടെ ഉദ്ഘാടനം നിർവഹിച്ച ശേഷം അത് യാഥാർത്ഥ്യമാക്കിയ തൊഴിലാളികളെ പ്രധാനമന്ത്രി നേരിൽ കാണാറുണ്ട്. അവർക്കൊപ്പം ആഹാരം കഴിക്കുകയും, ഫോട്ടോ എടുക്കുകയും ചെയ്യുന്നതും പതിവാണ്.

നരേന്ദ്ര മോദി അധികാരത്തിൽ എത്തിയ ശേഷം പദ്മ അവാർഡുകളിൽ നിന്നും വി ഐ പി സംസ്‌കാരം എടുത്തു കളയുകയുണ്ടായി. ഇതോടെ പത്മ അവാർഡ് ജേതാക്കളുടെ പട്ടികയിൽ സാധാരണക്കാരും ഇടം നേടി തുടങ്ങി. റിപ്പബ്ലിക് ദിന പരേഡ് നടത്തുന്ന പാതയായ രാജ്പഥിനെ കഴിഞ്ഞ വർഷം മുതൽ കർത്തവ്യ പാത എന്നാണ് അറിയപ്പെടുന്നത്. ഈ വർഷത്തെ റിപ്പബ്ലിക് ദിന പരേഡിന്റെ മുഖ്യ അതിഥി ഈജിപ്ത് പ്രസിഡന്റായ അബ്ദുൽ ഫത്താഹ് അൽസിസിയാണ്. ഈജിപ്തിൽ നിന്നുള്ള 120 അംഗങ്ങൾ പരേഡിൽ പങ്കെടുക്കുന്നുണ്ട്.

സമ്പൂർണ വീഡിയോ സ്റ്റോറി കാണുക