‘പിടി വിട്ടു, രക്ഷ തേടി’ വാഴക്കുല വിഷയത്തിൽ ചിന്ത ജെറോം ചങ്ങമ്പുഴയുടെ മകളുടെ വീട്ടിൽ

കൊച്ചി . തന്റെ പ്രബന്ധത്തിൽ ‘വാഴക്കുല’ മാറി ഡോക്ടറേറ്റ് കൈവിട്ടുപോകുമോ എന്ന അവസ്ഥയിൽ ചങ്ങമ്പുഴയുടെ മകളുടെ വീട്ടിൽ ഓടിയെത്തി യുവജന കമ്മീഷൻ അധ്യക്ഷ ചിന്ത ജെറോം. തെറ്റായ പ്രബന്ധത്തിനു ഡോക്ടറേറ്റ് നൽകിയത് പിൻവലിക്കണമെന്നും ഗൈഡ് നൽകിയവർക്കെതിരെ പോലും നടപടി ഉണ്ടാവണമെന്ന് ചങ്ങമ്പുഴയുടെ മകൾ ആവശ്യപെട്ടിരുന്നതാണ്.

ചങ്ങമ്പുഴയുടെ മകൾ ലളിത ചങ്ങമ്പുഴയുടെ എറണാകുളത്തെ വീട്ടിലെത്തി തനിക്ക് അബദ്ധം പറ്റിയതാണെന്നും, മനഃപൂർവ്വം സംഭവിച്ച തെറ്റല്ലെന്നും സാന്ദർഭികമായി സംഭവിച്ച പിഴവാണെന്നും ചിന്ത കുടുംബാം​ഗങ്ങളോട് പറയുകയുണ്ടായി. യൂണിവേഴ്സിറ്റി അന്വേഷണ കമ്മറ്റിയെ നിയോഗിക്കാനിരിക്കെയും, ഗവർണർ റിപ്പോർട്ട് ആവശ്യപ്പെട്ടിരിക്കെയുമാണ് ചിന്ത സ്വയ രക്ഷക്കായി ഇത്തരമൊരു നീക്കം നടത്തിയിരിക്കുന്നത്.

ഗവേഷണ പ്രബന്ധത്തിലെ പിഴവിൽ വിശദീകരണവുമായി ചങ്ങമ്പുഴയുടെ വീട്ടിലെത്തിയ ചിന്ത ജെറോം കുടുംബാം​ഗങ്ങളെ കാണുകയായിരുന്നു. തുടർന്ന് ഇരുവരും നിൽക്കുന്ന ചിത്രങ്ങൾ എടുത്ത് സാമൂഹ്യ മാധ്യമങ്ങളിൽ പങ്കുവെക്കുകയും ഉണ്ടായി. സോഷ്യൽ മീഡിയയിൽ പങ്കുവച്ച കുറിപ്പിലൂടെയാണ് ചങ്ങമ്പുഴയുടെ മകളെ കണ്ട വിവരം ചിന്ത അറിയിച്ചിട്ടുണ്ട്. ലളിത ചങ്ങമ്പുഴയ്ക്കൊപ്പമുള്ള ചിത്രങ്ങളും പങ്കുവച്ചു. വിഖ്യാതമായ വാഴക്കുല എന്ന കവിത എഴുതിയത് വൈലോപ്പിള്ളിയാണെന്നാണ് പ്രബന്ധത്തിൽ ചിന്ത എഴുതിയിരുന്നത്. ഇത് വൻ വിവാദങ്ങൾക്ക് കാരണമായിരുന്നു. അതിനു പിന്നാലെ സാന്ദർഭികമായി സംഭവിച്ച തെറ്റാണെന്ന് ചിന്ത വ്യക്തമാക്കിയിരുന്നു. അതിനു പിന്നാലെയാണ് ചങ്ങമ്പുഴയുടെ മകളെ കാണാൻ സ്വയ രക്ഷക്കായി എത്തിയിരിക്കുന്നത്.

ചിന്തയുടെ കുറിപ്പ്

‘ശ്രീ. ചങ്ങമ്പുഴ കൃഷ്ണപിള്ളയുടെ ഇളയമകൾ ശ്രീമതി ലളിത ചങ്ങമ്പുഴയെ വീട്ടിലെത്തി കണ്ടു. ഹൃദയം നിറഞ്ഞ വാത്സല്യത്തോടു കൂടിയാണ് ലളിതാമ്മ സ്വീകരിച്ചത്. മണിക്കൂറുകൾ വീട്ടിൽ ചെലവഴിച്ചു. അമ്മയും കമ്മീഷൻ അംഗങ്ങളായ ഡോ. പ്രിൻസികുര്യാക്കോസും, റെനീഷ് മാത്യുവും ഒപ്പമുണ്ടായിരുന്നു. എറണാകുളം വരുമ്പോഴെല്ലാം വീട്ടിൽ എത്തണമെന്ന സ്നേഹനിർഭരമായ വാക്കുക്കൾ പറഞ്ഞാണ് അമ്മ യാത്ര അയച്ചത്. ഒത്തിരി സ്നേഹം, വീണ്ടും വരാം’