ട്രെയിന്‍ തീവെപ്പ് കേസ്, എന്‍ഐഎ ഷാരൂഖ് സെയ്ഫിയുമായി തെളിവെടുപ്പ് നടത്തി

കണ്ണൂര്‍. ട്രെയിന്‍ തീവെപ്പ് കേസിലെ പ്രതി ഷാറൂഖ് സെയ്ഫിയുമായി എന്‍ഐഎ തെളിവെടുപ്പ് നടത്തി. ഷാറൂഖ് പെട്രോള്‍ വാങ്ങിയ പമ്പിലും തെളിവെടുപ്പ് നടത്തും. കേരള പോലീസില്‍ നിന്നും എന്‍ഐഎ കേസ് ഏറ്റെടുത്ത ശേഷം ആദ്യമായാണ് കേസിലെ പ്രതിയെ തെളിവെടുപ്പിന് എത്തിക്കുന്നത്. റെയില്‍ വേസ്റ്റേഷന്‍ പരിസരത്ത് എത്തിച്ചാണ് തെളിവെടുപ്പ് നടത്തുന്നത്. മുമ്പ് പോലീസും പ്രതിയെ കണ്ണൂരില്‍ എത്തിച്ച് തെളിവെടുപ്പ് നടത്തിയിരുന്നു.

ട്രെയിനില്‍ തീവച്ച ശേഷം കണ്ണൂരിലെത്തിയ പ്രതി അവിടെ നിന്ന് മറ്റൊരു ട്രെയിനില്‍ കയറിയായിരുന്നു രത്‌നഗിരിയിലെത്തിയത്. ഒന്നാം നമ്പര്‍ പ്ലാറ്റ്‌ഫോമില്‍ നിന്നാണ് പ്രതി യാത്ര ചെയ്തത്. ഷാരൂഖിനെ ഇവിടെയെത്തിച്ച് വിശദമായ തെളിവെടുപ്പ് നടത്തും. നേരത്തെ പോലീസും പ്രതിയെ കണ്ണൂര്‍ റെയില്‍വേ സ്റ്റേഷനിലെത്തിച്ച് തെളിവെടുത്തിരുന്നു. തീവെച്ച ബോഗിയിലും എത്തിച്ചിരുന്നു. ബോഗിയില്‍ രക്തക്കറകളുണ്ടായിരുന്നു. എന്നാല്‍ കൂടുതല്‍ വിശദമായ തെളിവെടുപ്പിലേക്ക് പോലീസ് കടന്നിരുന്നില്ല.

എലത്തൂരില്‍ നിന്ന് അതേ ട്രെയിനില്‍ തന്നെ കണ്ണൂരിലെത്തിയെന്നായിരുന്നു പ്രതിയുടെ മൊഴി. മെയ് 2 മുതലാണ് ഷാരൂഖ് സെയ്ഫിയെ എന്‍ ഐ എയ്ക്ക് കസ്റ്റഡിയില്‍ ലഭിച്ചത്. തിങ്കളാഴ്ച കസ്റ്റഡി കാലാവധി അവസാനിക്കും. ഏപ്രില്‍ 2 ന് ആലപ്പുഴ കണ്ണൂര്‍ എക്‌സ്പ്രസില്‍ കയറി യാത്രക്കാരുടെ ദേഹത്ത് തീ കൊളുത്തിയ ഷാരൂഖ് സെയ്ഫി കൃത്യമായ ആസൂത്രണത്തോടെയാണ് ഒരോ നീക്കവും നടത്തിയതെന്ന മൊഴി എന്‍ഐഎയ്ക്ക് ലഭിച്ചിരുന്നു.