ട്രെയിനിലെ തീപിടിത്തം ഗൗരവമേറിയത് – റെയിൽവേ മന്ത്രി

ന്യൂ ഡൽഹി . എലത്തൂ‍രിൽ ഓടുന്ന ട്രെയിനിൽ നടന്ന ആക്രമണത്തിന്‍റെ വിശദാംശങ്ങള്‍ കേരളത്തില്‍ നിന്ന് തേടാൻ കേന്ദ്ര ആഭ്യന്തരമന്ത്രാലയം. ട്രെയിനിൽ തീവെച്ച സംഭവം ആസൂത്രിതമാണെന്നതിനു കൂടുതല്‍ തെളിവുകള്‍ ലഭിച്ചാല്‍ സംഭവത്തില്‍ എൻഐഎയും അന്വേഷണം നടത്തും.

സംഭവം ഗൗരവതരമാണെന്നും മുഖ്യമന്ത്രി പിണറായി വിജയനോട് ഇക്കാര്യം സംസാരിക്കുമെന്നും കേന്ദ്ര റെയില്‍വെ മന്ത്രി അശ്വിനി വൈഷണവ് പറഞ്ഞു. സംഭവത്തിൽ പോലീസ് അന്വേഷണം പുരോഗമിക്കുകയാണ്. തീവ്രവാദ വിരുദ്ധ സ്ക്വാഡും സ്ഥലത്തെത്തി വിവരങ്ങൾ തേടിയിട്ടുണ്ട് – കേന്ദ്ര മന്ത്രി പറഞ്ഞു. അതേസമയം, ആലപ്പുഴ കണ്ണൂര്‍ എക്സിക്യൂട്ടീവ് ട്രെയിനില്‍ ഞായറാഴ്ച രാത്രി തീയിട്ട സംഭവവുമായി ബന്ധപ്പെട്ട് പൊലീസ് പുറത്തുവിട്ട സിസിടിവി ദൃശ്യങ്ങളിലുള്ളയാള്‍ സമീപവാസിയാണെന്നു വ്യക്തമായതോടെ ഇയാൾ അല്ല അക്രമിയെന്ന് നിലപാടിലേക്ക് പോലീസ്.

കാപ്പാട് സ്വദേശിയുടെ ചിത്രമാണ് പോലീസ് പുറത്ത് വിട്ടിരുന്നത്. സംഭവം നടന്ന് ഏതാണ്ട് 2 മണിക്കൂറിനു ശേഷമുള്ള സിസിടിവി ദൃശ്യങ്ങളാണ് പുറത്ത് വന്നത്. ബാഗും ഫോണും കൈവശമുണ്ടായിരുന്നു. ഇയാളെ മറ്റൊരാള്‍ വന്ന് കൂട്ടികൊണ്ട് പോകുന്നതാണ് ദൃശ്യങ്ങളിലുള്ളത്. വലിയ പൊലീസ് സന്നാഹവും ആള്‍ക്കൂട്ടവും ഉളള സ്ഥലത്ത് അക്രമി രണ്ട് മണിക്കൂറോളം നില്‍ക്കാന്‍ സാധ്യതയില്ലെന്നാണ് പോലീസിന്റെ ഇക്കാര്യത്തിലെ വിലയിരുത്തല്‍. അതിനാൽ ദൃശ്യങ്ങളെ കേന്ദ്രീകരിച്ചുള്ള അന്വേേഷണം പൊലീസ് അവസാനിപ്പിച്ചെന്നാണ് പുറത്ത് വരുന്ന റിപ്പോർട്ടുകൾ.