തിരഞ്ഞെടുപ്പിനിടെ ചേരിതിരിഞ്ഞ് ഏറ്റുമുട്ടി കോൺഗ്രസും തൃണമൂലും, ടിഎംസി പ്രവർത്തകർ പരസ്യമായി ബാലറ്റുകൾ കൊള്ളയടിക്കുന്നുവെന്ന് ബിജെപി അദ്ധ്യക്ഷൻ

കൊൽക്കത്ത : പശ്ചിമ ബംഗാളിൽ പഞ്ചായത്ത് തിരഞ്ഞെടുപ്പ് ആരംഭിച്ചതിന് പിന്നാലെ വിവിധ ഇടങ്ങളിൽ തൃണമൂൽ കോൺഗ്രസ് പ്രവർത്തകരുടെ ഗുണ്ടായിസമെന്ന് ബിജെപി സംസ്ഥാന അദ്ധ്യക്ഷൻ സുകാന്ത മജുംദാർ. സംഘർഷത്തിൽ നിരവധി പേർക്ക് ജീവൻ നഷ്ടപ്പെട്ടു . തൃണമൂൽ പ്രവർത്തകരുടെ ആക്രമണത്തിൽ ബിജെപിയുടെ പോളിംഗ് ഏജന്റും കൊല്ലപ്പെട്ടവരിൽ ഉൾപ്പെടുന്നു. സംസ്ഥാനത്ത് ഗുണ്ടായിസം അഴിച്ചുവിട്ട് തൃണമൂൽ പ്രവർത്തകർ എല്ലാ പരിധികളും ലംഘിച്ചെന്നും, മുഖ്യമന്ത്രി മമത ബാനർജിയും സംസ്ഥാന ചീഫ് ഇലക്ടറൽ ഓഫീസറും കൊലപാതകങ്ങൾക്ക് ഉത്തരവാദികൾ ആണെന്നും ബിജെപി സംസ്ഥാന അദ്ധ്യക്ഷൻ പറഞ്ഞു.

നോർത്ത് 24 പർഗനാസിലെ ബസുദേബ്പൂരിലെ ടിഎംസി സ്ഥാനാർത്ഥി, ഒരു സ്വതന്ത്ര മുസ്ലീം സ്ഥാനാർത്ഥിയെ കൊല്ലുകയും ചെയ്തു. അക്രമത്തിന്റെയും കൊലപാതകത്തിന്റെയും ബൂത്ത് പിടിച്ചെടുക്കലിന്റെയും ഭാഷ മാത്രമേ ടിഎംസിക്ക് അറിയൂ. ഈ കൊലപാതകങ്ങൾക്ക് ഉത്തരവാദി മുഖ്യമന്ത്രി മമത ബാനർജിയാണെന്നും സുകാന്ത മജുംദാർ വിമർശിച്ചു. സംസ്ഥാനത്തെ പല പോളിംഗ് ബൂത്തുകളിൽ നിന്നും ടിഎംസിയുടെ പ്രവർത്തകർ ബാലറ്റുകൾ കൊള്ളയടിക്കുന്ന സാഹചര്യം ഉണ്ടായി

ഒരു വശത്ത്, കേന്ദ്ര സേനയെ വിന്യസിക്കാൻ എസ്‌ഇ‌സി വിമുഖത കാണിക്കുന്നു. മറുവശത്ത്, തിരഞ്ഞെടുപ്പ് ഡ്യൂട്ടിക്ക് സിവിൽ വോളന്റിയർമാരെ വിന്യസിക്കുന്നു. ഇതിലൂടെ സംസ്ഥാന സർക്കാരും എസ്‌ഇ‌സിയും കോടതികളെ കബളിപ്പിക്കുകയാണെന്ന് വ്യക്തമാണെന്നും അദ്ദേഹം പറഞ്ഞു.