വിവാഹ പാർട്ടി സഞ്ചരിച്ച വാഹനം പുഴയിലേയ്ക്ക് മറിഞ്ഞ് അപകടം, കുഞ്ഞുങ്ങളുൾപ്പടെ അഞ്ചുപേർ മരിച്ചു

ഭോപ്പാൽ : വിവാഹത്തിൽ പങ്കെടുക്കാൻ പോയ സംഘം സഞ്ചരിച്ച ട്രക്ക് പുഴയിലേയ്ക്ക് മറിഞ്ഞ് അഞ്ചുപേർ മരിച്ചു. മദ്ധ്യപ്രദേശിലെ ദാതിയ ജില്ലയിൽ ഇന്നലെ രാത്രിയാണ് അപകടമുണ്ടായത്. മരിച്ചവരിൽ കുഞ്ഞുങ്ങളുമുണ്ട്. 65 വയസുള്ള സ്ത്രീയും 18 വയസുള്ള യുവാവും രണ്ടും മൂന്നും വയസുള്ള മൂന്ന് കുട്ടികളുമാണ് മരണപ്പെട്ടത്.

രാത്രി ഏറെ വൈകിയാണ് ട്രക്ക് ബുഹാറ ഗ്രാമത്തിൽ എത്തിയത്. വാഹനത്തിന്റെ ചക്രം തെന്നി നദിയിലേയ്ക്ക് വീഴുകയായിരുന്നുവെന്നാണ് വിവരം. 24പേർക്ക് പരിക്കേറ്റിട്ടുണ്ട്. വാഹനത്തിലുണ്ടായിരുന്ന നിരവധി കുട്ടികളെ കാണാതായതായും റിപ്പോർട്ടുണ്ട്. രക്ഷാപ്രവർത്തനം പുരോഗമിക്കുകയാണ്. ഗ്വാളിയോറിലെ ബിൽഹേതി ഗ്രാമത്തിലുള്ളവരാണ് വാഹനത്തിലുണ്ടായിരുന്നത്.

അതേസമയം വാഹനാപകടത്തില്‍ പരിക്കേറ്റ് ചികിത്സയിലായിരുന്നു കന്നട നടൻ സൂരജ് കുമാര്‍ എന്ന ധ്രുവന്റെ വലതുകാല്‍ മുറിച്ചുമാറ്റി. കഴിഞ്ഞ ശനിയാഴ്‍ച മൈസൂരു-ഊട്ടി റോഡിലായിരുന്നു അപകടം. ഊട്ടിയിൽനിന്ന് ബൈക്കിൽ മടങ്ങവെ ട്രാക്ടറിനെ മറികടക്കാൻ ശ്രമിക്കുന്നതിനിടെ നിയന്ത്രണം വിട്ട് ടിപ്പറിൽ ഇടിക്കുകയായിരുന്നു. ലോറിയുടെ ടയറിനടിയില്‍ കാല്‍ കുടുങ്ങുകയും ചതയുകയും ചെയ്‍തിരുന്നു.

നായകനായ ആദ്യ ചിത്രം ‘രഥം’ റിലീസിനൊരുങ്ങവെയാണ് അപകടം. മലയാളി നടി പ്രിയ വാര്യറാണ് ചിത്രത്തിലെ നായിക. ഇരുപത്തിനാലുകാരനായ സൂരജ് കുമാര്‍ കന്നട സിനിമ നിര്‍മാതാവായ എസ്.എ ശ്രീനിവാസന്റെ മകനാണ്.