കെട്ടിടാവശിഷ്ടങ്ങള്‍ക്കിടയില്‍ ജീവൻ മുറുകെപ്പിടിച്ച് 17കാരൻ കഴിഞ്ഞത് 94 മണിക്കൂര്‍; ദാഹം സഹിക്കാനാകാതെ സ്വന്തം മൂത്രം കുടിച്ചു

ഗാസിയന്റെപ് : നാലുദിവസത്തിലേറെ കെട്ടിടാവശിഷ്ടങ്ങള്‍ക്കിടയില്‍ ജീവൻ മുറുകെപ്പിടിച്ച് അദ്നാന്‍ മുഹമ്മദ് രക്ഷകരെ കാത്തുകിടന്നു. 94 മണിക്കൂറിനുശേഷം രക്ഷാപ്രവര്‍ത്തകര്‍ ജീവനോട് ആശുപത്രിയിലെത്തിച്ചു. അതിനിടെ അനുഭവിച്ചത് സമാനതകളില്ലാത്ത കഷ്ടപ്പാടുകള്‍. ദാഹം സഹിക്കവയ്യാതെ സ്വന്തം മൂത്രം കുടിച്ചെന്ന് അദ്നാന്‍ പറഞ്ഞു. രക്ഷാപ്രവര്‍ത്തകരെ അകലെ കാണുന്നുണ്ടായിരുന്നു.

എന്നാൽ തന്റെ ശബ്ദം ആരും കേട്ടില്ല. ക്ഷീണംകാരണം ഉറങ്ങിപ്പോകുമോ എന്ന പേടികാരണം ഓരോ 25 മിനിറ്റ് കൂടുമ്പോഴും ഫോണില്‍ അലാറം വെക്കും. രണ്ടുദിവസം കഴിഞ്ഞപ്പോള്‍ ബാറ്ററി തീര്‍ന്ന് ഫോണ്‍ നിശ്ചലമായി. കാത്തിരിപ്പിനൊടുവിൽ രക്ഷകർ അവനെ കണ്ടെത്തി. തിരികെ ജീവിതത്തിലേക്ക് കൈപിടിച്ചുകയറ്റി.

രക്ഷാപ്രവര്‍ത്തനത്തിനിടെ എല്ലാം തകര്‍ന്നുവീഴുമെന്ന് തോന്നി. പക്ഷേ, സുരക്ഷിതനായി ആശുപത്രിയിലെത്തി. ‘രക്ഷിക്കാനെത്തിയവര്‍ക്ക് നന്ദി’-ആശുപത്രിക്കിടക്കയില്‍നിന്ന് അദ്നാന്‍ പറഞ്ഞു. അതേസമയം തുര്‍ക്കിയിലും സിറിയയിലും കൊടുംനാശം വിതച്ച ഭൂകമ്പത്തില്‍ മരിച്ചവരുടെ എണ്ണം 25,000 കടന്നു. ശനിയാഴ്ച രക്ഷാപ്രവര്‍ത്തകര്‍ കെട്ടിടാവശിഷ്ടങ്ങള്‍ക്കടിയില്‍നിന്ന് കൂടുതല്‍ മൃതദേഹങ്ങള്‍ കണ്ടെടുത്തു. ശീതക്കാറ്റും മഞ്ഞുവീഴ്ചയും ശക്തമായത് രക്ഷാപ്രവര്‍ത്തനത്തെ ബാധിച്ചു. ഭൂകമ്പം, സിറിയയില്‍മാത്രം 53 ലക്ഷം ആളുകളെ ഭവനരഹിതരാക്കിയെന്ന് യു.എന്‍. റിപ്പോര്‍ട്ടുചെയ്തു.