ആഴങ്ങളില്‍ മുങ്ങി താഴ്ന്ന് മൂന്ന് ജീവനുകള്‍ മരണത്തില്‍ നിന്നും ജീവിതത്തിലേക്ക് നീന്തി കയറ്റി രണ്ട് കുരുന്നുകള്‍

പാലക്കാട്: പുഴയുടെ ആഴങ്ങളിലേക്ക് ഇറങ്ങുമ്പോള്‍ ആ കരുന്നുകളുടെ മനസ്സ് പകച്ചില്ല. പുഴയുടെ ആഴങ്ങളിലേക്ക് മുങ്ങി താഴുന്ന മൂന്ന് ജീവനുകള്‍ രക്ഷപ്പെടുത്തുക എന്നത് മാത്രമായിരുന്നു അവരുടെ ലക്ഷ്യം. നാല് വയസ്സുകാരന്‍ നാഥു, മുത്തശ്ശി രത്‌നം(54), അയല്‍വാസി ശാന്ത(60) എന്നിവരെയാണ് മരണത്തിന്റെ ആഴങ്ങളില്‍ നിന്നും രണ്ട് കുരുന്നുകളുടെ സമയോചിത ഇടപെടലില്‍ തിരികെ ലഭിച്ചത്.

ഇന്നലെ വൈകിട്ട് ആറരയോടെയാണ് മലമ്പുഴ കടുക്കാംകുന്നം വാരണിപ്പുഴപ്പാലത്തിനു താഴെ തടയണയില്‍ നാഥും മുത്തശ്ശിയും അയല്‍വാസിയും കുളിക്കാനും അലക്കാനും എത്തിയത്. കുളിക്കാനായി ഇറങ്ങുന്നതിനിടെ ശാന്തമ്മയും നാഥും കാല്‍ തെന്നി ആഴത്തിലേക്ക് വീണു. ഇത് കണ്ട് രത്‌നം നിലവിളിച്ചെങ്കിലും ആരും സഹായിക്കാനുണ്ടായിരുന്നില്ല. ഒടുവില്‍ അവരെ രക്ഷിക്കാന്‍ എടുത്ത് ചാടി രത്‌നവും മുങ്ങി താഴ്ന്നു.

തടയണയ്ക്കു കുറച്ചകലെ നീന്തിക്കളിക്കുകയായിരുന്നു വാരണി അക്കരക്കാട് കണ്ണന്‍സുനിത ദമ്പതികളുടെ മകന്‍ കെ.അശ്വിനും(12), അരവിന്ദാക്ഷന്‍ശുഭ ദമ്പതികളുടെ മകന്‍ എ. എസ്. അശ്വിനും(11) സംഭവം കണ്ടു കരയ്ക്കുകയറി ഇവിടേക്ക് ഓടിയെത്തുകയായിരുന്നു. ആദ്യം കെ. അശ്വിന്‍ കുട്ടിയെ മുങ്ങിയെടുത്തു. ഇതിനു പിന്നാലെ എ.എസ്. അശ്വിന്‍ ശാന്തമ്മയെയും രത്‌നത്തെയും കൈയില്‍ പിടിച്ച് ഏറെ പ്രയാസപ്പെട്ടു വലിച്ചു കയറ്റുകയായിരുന്നു.

ഈ സമയം പ്രദേശവാസികളും ഓടിയെത്തി. മൂവരെയുമായി ആശുപത്രിയിലേക്ക് പാഞ്ഞു. സ്വകാര്യ ആശുപത്രിയില്‍ ചികിത്സയ്ക്ക് ശേഷം ഇവരെ രാത്രിയോടെ വീട്ടിലേക്ക് വിട്ടയച്ചു. കെ.അശ്വിന്‍ മലമ്പുഴ സെന്റ് ജൂഡ് സ്‌കൂളിലെ ആറാം ക്ലാസ് വിദ്യാര്‍ഥിയും എ.എസ്.അശ്വിന്‍ അകത്തേത്തറ എയുപി സ്‌കൂളിലെ അഞ്ചാം ക്ലാസ് വിദ്യാര്‍ഥിയുമാണ്. വെള്ളത്തില്‍ നിന്നു വേഗത്തില്‍ പുറത്തെടുക്കാനായതും പ്രാഥമിക ചികിത്സ നല്‍കാനായതും രക്ഷയായെന്നും മൂവരുടെയും ആരോഗ്യ നില തൃപ്തികരമാണെന്നും ആശുപത്രി അധികൃതര്‍ അറിയിച്ചു.