കേരളത്തിൽ യുഡിഎഫും എൽഡിഎഫും ഒറ്റകെട്ട് ; രണ്ട് കൂട്ടരും കൂടി ഒന്നിച്ചാലും ഒന്നും നടക്കില്ലെന്ന് സുരേന്ദ്രൻ

തിരുവനന്തപുരം : സംസ്ഥാനത്ത് എൽഡിഎഫും യുഡിഎഫും  ഒറ്റമുന്നണിയാണെന്ന് ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. സംസ്ഥാന സർക്കാരിന്റെ അഴിമതിക്കും ജനദ്രോഹനങ്ങൾക്ക് എതിരെയും എൻഡിഎ സെക്രട്ട്രിയേറ്റിലേക്ക് നടത്തിയ മാർച്ചിലാണ് സുരേന്ദ്രൻ ഇത് പറഞ്ഞത്. കേരളത്തിലെ തന്നെ ഒരു പ്രബല മുന്നണിയാണ് ദേശീയ ജനാധിപത്യ സഖ്യമെന്ന് കെ.സുരേന്ദ്രൻ പറഞ്ഞു. എൻഡിഎയുടെ മുന്നേറ്റത്തെ ഇടത് വലത് മുന്നണികൾ ഭയക്കുന്നു.

സംസ്ഥാനത്ത് യുഡിഎഫും എൽഡിഎഫും ഒറ്റകെട്ടാണ്. രാഹുലിന്റെ അയോഗ്യത അതിനൊരു മറയാക്കി എന്ന് മാത്രം. രണ്ട് കൂട്ടരും കൂടി ഒന്നിച്ചാലും ഒന്നും നടക്കില്ല. കെ.സുരേന്ദ്രൻ പറഞ്ഞു. എല്ലായിടത്തും അഴിമതിയാണ്. ബ്രഹ്‌മപുരത്ത് നടന്നതും വലിയ അഴിമതിയാണ്. അഴിമതി തുക നേരേയെത്തുന്നത് മുഖ്യമന്ത്രിയുടെ കൈകളിലേക്കാണെന്നും അദ്ദേഹം പറഞ്ഞു.

ബ്രഹ്‌മപുരത്തെ അഴിമതിയുടെ പിന്നിൽ പ്രതിപക്ഷ നേതാവ് വി ഡി സതീശന്റെ കറുത്ത കരങ്ങളുണ്ടെന്നും അദ്ദേഹം ആരോപിച്ചു. എല്ലാ ജനങ്ങളും അഴിമതി തിരിച്ചറിഞ്ഞു. ദേശീയപാത വികസിപ്പിക്കുന്നത് കേന്ദ്രമാണ്, എന്നാൽ കേരളത്തിലെ സർക്കാർ ഇത് തങ്ങളുടെ പേരിലാക്കി മാറ്റുകയാണ്. പൊതുമരാമത്ത് മന്ത്രിയുൾപ്പടെയുള്ളവർ നുണ പ്രചരണം നടത്തുകയാണ്. എന്നിട്ടത് സമൂഹമാദ്ധ്യമങ്ങളിൽ പ്രചരിപ്പിക്കുകയാണെന്നും അദ്ദേഹം പറഞ്ഞു.