ഇന്ത്യ ഐ ടി വിദഗ്ധൻ, പാകിസ്ഥാൻ തീവ്രവാദ വിദഗ്ധൻ, പരിഹാസവുമായി കേന്ദ്ര മന്ത്രി എസ് ജയ്‌ശങ്കർ

ന്യൂഡൽഹി. ലോകരാജ്യങ്ങളിൽ ഇന്ത്യയെ ഐടി (ഇൻഫർമേഷൻ ടെക്‌നോളജി) വിദഗ്ദ്ധനായി കാണുമ്പോൾ പാകിസ്ഥാനെ അന്താരാഷ്ട്ര തീവ്രവാദ വിദഗ്ദ്ധനാ യിട്ടാണ് അറിയപ്പെടുന്നതെന്ന് കേന്ദ്ര മന്ത്രി എസ് ജയ്‌ശങ്കർ. താനും പാകിസ്ഥാനെ പരിഹസിക്കുന്നതിൽ ഒട്ടും പിന്നിലല്ലെന്നു തെളിയിച്ചിരിക്കുകയാണ് ജയശങ്കർ.

‘ഉയരുന്ന ഇന്ത്യയും ലോകവും: മോദി യുഗത്തിലെ വിദേശനയം’ എന്ന വിഷയത്തിൽ നടത്തിയ പ്രസംഗത്തിലാണ് അദ്ദേഹം പാകിസ്ഥാനെ പരിഹസിച്ചിരിക്കുന്നത്. ലോകരാജ്യങ്ങളിൽ ഇന്ത്യയെ ഐടി (ഇൻഫർമേഷൻ ടെക്‌നോളജി) വിദഗ്ദ്ധനായി കണക്കാക്കുമ്പോൾ, അയൽ രാജ്യത്തെ അന്താരാഷ്ട്ര തീവ്രവാദത്തിലെ (ഇന്റർനാഷണൽ ടെററിസം) വിദഗ്ദ്ധൻ എന്നാണ് അറിയപ്പെടുന്നതെന്ന് ജയശങ്കർ പറഞ്ഞു.

നരേന്ദ്ര മോദി സർക്കാരിന്റെ നയതന്ത്രമാണ് മറ്റ് രാജ്യങ്ങളെ തീവ്രവാദ ഭീഷണിയെ ഗൗരവമായി കാണുന്നതിന് ഇടയാക്കിത്. ലോകത്ത് മറ്റൊരു രാജ്യവും പാകിസ്ഥാൻ ചെയ്ത പോലെ ഭീകരവാദം വളർത്തുന്നില്ല. ഇത്രയും നാൾ പാകിസ്ഥാൻ എന്താണ് ഇന്ത്യയ്‌ക്കെതിരെ ചെയ്തതെന്ന് ലോകത്തിന് മുന്നിൽ കാട്ടിതന്നു. തീവ്രവാദം ഇപ്പോൾ അടങ്ങിയിട്ടില്ലെങ്കിൽ ഭാവിയിൽ തങ്ങൾക്കും ദോഷം ചെയ്യുമെന്ന കാര്യത്തിൽ ഇന്ത്യ മറ്റ് രാജ്യങ്ങളെ ബോധവാൻമാരാക്കി – കേന്ദ്ര മന്ത്രി എസ് ജയ്‌ശങ്കർ പറഞ്ഞു.

‘അവിഭക്ത ഇന്ത്യ’ എന്ന സർദാർ വല്ലഭായ് പട്ടേലിന്റെ കാഴ്ചപ്പാട് മോദി ഭരണകൂടം എങ്ങനെ നിറവേറ്റുമെന്നുള്ള ഒരു വിദ്യാർത്ഥിയുടെ ചോദ്യത്തിന്, വിഭജനം തീവ്രവാദം പോലുള്ള പ്രശ്നങ്ങളിലേക്ക് നയിച്ച വലിയ ദുരന്തമാണെന്ന് ജയശങ്കർ പ്രതികരിക്കുകയുണ്ടായി. ‘സർദാർ പട്ടേലിന്റെ സ്വപ്നം സാക്ഷാത്കരിക്കാനുള്ള ഏറ്റവും നല്ല മാർഗം ഇന്ത്യ ശക്തവും വിജയകരവും ആത്മവിശ്വാസവുമു ള്ളതായിരിക്കുക എന്നതാണെന്നും സംവാദത്തിൽ പങ്കെടുത്ത് സംസാരിക്കവെ എസ് ജയ്‌ശങ്കർ പറഞ്ഞു.