ശമ്പളവും പെൻഷനും നൽകാൻ പണമില്ല, സ്ഥിര നിക്ഷേപങ്ങൾ പിൻവലിക്കാൻ ഒരുങ്ങി സർവ്വകലാശാലകൾ, പ്രതിസന്ധി

തിരുവനന്തപുരം: സംസ്ഥാനത്തെ സർവ്വകലാശാലകൾ കടുത്ത പ്രതിസന്ധിയിൽ. ശമ്പളത്തിനും പെൻഷൻ നൽകാനും പണമില്ലാതായതോടെ പരുങ്ങലിലാണ് സർവ്വകലാശാലകൾ. ഇതോടെ സ്ഥിര നിക്ഷേപങ്ങൾ പിൻ വലിച്ച് നിലവിലെ സാമ്പത്തിക പ്രതിസന്ധി മറികടക്കാനാണ് നീക്കം. ഈ മാസം 31 ന് കൂട്ടത്തോടെ വിരമിക്കുന്നവരുടെ ആനുകൂല്യങ്ങളും ഇതിടെ തുലാസിൽ ആവുകയാണ്. തനത് ഫണ്ടിലെ കോടികൾ ട്രഷറിയിലേക്ക് നിർബന്ധിച്ചു മാറ്റിയ സർക്കാർ കഴിഞ്ഞ സാമ്പത്തിക വർഷത്തെ പദ്ധതിയേതര ഗ്രാൻ്റിന്റെ അവസാന ഗഡുവായ 89.02 കോടി റദ്ദാക്കുകയും ചെയ്തു. ഇതോടെ ശമ്പളവും പെൻഷനും മുടങ്ങാതിരിക്കാൻ സ്ഥിര നിക്ഷേപങ്ങൾ പിൻവലിക്കുകയാണ് യൂണിവേഴ്സിറ്റികൾ.

സ്ഥിര നിക്ഷേപങ്ങൾ പിൻവലിക്കുന്നതോടെ വിവിധ സർവകലാശാലകളിൽ നടന്നു വന്ന വികസന പ്രവർത്തനങ്ങളും നിലയ്ക്കും. രൂക്ഷമായ സാമ്പത്തിക പ്രതിസന്ധിയിലാണ് സംസ്ഥാനത്തെ സർവകലാശാലകളുടെ പ്രവർത്തനം. കേരള, കാലിക്കറ്റ് എംജി കാർഷിക സർവകലാശാല ഓപ്പൺ സർവകലാശാല സംസ്കൃതം യൂണിവേഴ്സിറ്റികളിലും സ്ഥിതിഗതികൾ മോശമാണ്. കൂടാതെ യൂണിവേഴ്സിറ്റി ജീവനക്കാരുടെയും അധ്യാപകരുടെയും പെൻഷൻ വിരമിക്കൽ ആനുകൂല്യങ്ങൾ നൽകുന്നതിൽ നിന്ന് സർക്കാർ പിന്മാറുന്നതും ഇരുട്ടടിയാകുന്നു.

ഈ പ്രതിസന്ധിക്ക് പരിഹാരമായി പെൻഷൻ ഫണ്ടും പെൻഷൻഫണ്ട് ബോർഡും രൂപീകരിക്കാൻ ധനവകുപ്പ് ഉത്തരവിറക്കിയിരുന്നു. എന്നാൽ പ്രതിഷേധങ്ങളെത്തുടർന്ന് പിന്നീട് മരവിപ്പിച്ചു. ശമ്പളത്തിന് 25% എല്ലാ മാസവും 10നകം പെൻഷൻഫണ്ടിലേക്ക് മാറ്റണം. ഇതിന്റെ 10% സംസ്ഥാന വിഹിതമായി സർക്കാർ ഗ്രാൻഡിൽ നിന്ന് വരവ് വക്കാം. ശേഷിക്കുന്ന 15 ശതമാനം സർവ്വകലാശാലകൾ തനത് ഫണ്ടിൽ നിന്ന് കണ്ടെത്തണമെന്നാണ് ഉത്തരവ്.