സ്‌നേഹം അറിയിച്ച എല്ലാ അമ്മമാർക്കും ഈ വിജയം സമർപ്പിക്കുന്നു, മേപ്പടിയാന്റെ വിജയത്തിൽ ഉണ്ണി മുകുന്ദൻ

കഴിഞ്ഞ ദിവസം പ്രദർശനത്തിനെത്തിയ മേപ്പടിയാൻ വൻവിജയമായെന്ന് നിർമ്മാതാവും നടനുമായ ഉണ്ണിമുകുന്ദൻ. സിനിമയുടെ വിജയം ആഘോഷമാക്കാൻ തന്നെയാണ് അണിയറ പ്രവർത്തകരുടെ തീരുമാനം. കഴിഞ്ഞദിവസം പ്രദർശനത്തിനെത്തിയ ചിത്രത്തിന് മികച്ച പ്രതികരണമാണ് പ്രേക്ഷകരുടെ ഭാഗത്തുനിന്ന് ലഭിക്കുന്നത്. ഇപ്പോഴിതാ മേപ്പടിയാനെയും ജയകൃഷ്ണനെയും ഏറ്റെടുത്തവർക്ക് നന്ദി അറിയിച്ചെത്തിയിരിക്കുകയാണ് ഉണ്ണി മുകുന്ദൻ. മേപ്പടിയാന്റെ വിജയം സ്‌നേഹം അറിയിച്ച എല്ലാ അമ്മമാർക്കും സമർപ്പിക്കുന്നുവെന്ന് ഉണ്ണി മുകുന്ദൻ കുറിച്ചു.

വിഷ്ണു മോഹനാണ്‌ മേപ്പടിയാൻ സംവിധാനം ചെയ്‌തത്‌. മസിൽമാൻ വേഷങ്ങളിൽ നിന്ന് മേപ്പടിയാൻ വ്യത്യസ്ഥമെന്ന് ഉണ്ണി മുകുന്ദൻ പ്രതികരിച്ചു. കൊവിഡ് കാരണം പല വട്ടം ചിത്രത്തിൻറെ റിലീസിങ് മാറ്റിവച്ചെങ്കിലും പുതുവർഷത്തിൽ ചിത്രം ജനങ്ങളിലേക്ക് എത്തിക്കാൻ അണിയറ പ്രവർത്തകർ തീരുമാനിക്കുകയായിരുന്നു.

കുടുംബം എന്താണെന്ന് അറിഞ്ഞവർ ഈ സിനിമ ഇഷ്ടപ്പെടാതെ പോകില്ലെന്നാണ് ജനങ്ങളുടെ പ്രതികരണം. ജനുവരി 14നാണ് ചിത്രം റിലീസ് ആയത്. നീണ്ട ഇടവേളയ്‌ക്ക് ശേഷം തീയേറ്ററിൽ എത്തുന്ന ഉണ്ണി മുകുന്ദൻ ചിത്രമാണ് മേപ്പടിയാൻ. ഉണ്ണി മുകുന്ദൻ ആദ്യമായി നിർമ്മിക്കുന്ന ചിത്രം കൂടിയാണിത്. സാധരണക്കാരന്റെ ജീവിതത്തിൽ അപ്രതീക്ഷിതമായി ഉണ്ടാകുന്ന ചില സംഭവങ്ങൾ ആണ് മേപ്പടിയാനിലൂടെ പറയുന്നത്.

വർക്ക്‌ ഷോപ്പ് നടത്തിപ്പുകാരനായ ജയകൃഷ്ണൻ എന്ന തനി നാട്ടിൻപുറംകാരൻ യുവാവായിട്ടാണ് ഉണ്ണി അഭിനയിക്കുന്നത്. അഞ്ജു കുര്യനാണ് നായിക. ഇന്ദ്രൻസ്, സൈജു കുറുപ്പ്, അജു വർഗീസ്, വിജയ് ബാബു, കലാഭവൻ ഷാജോൺ, മേജർ രവി, ശങ്കർ രാമകൃഷ്ണൻ, ശ്രീജിത്ത് രവി, കോട്ടയം രമേശ്, കൃഷ്ണ പ്രസാദ്, കുണ്ടറ ജോണി, ജോർഡി പൂഞ്ഞാർ, സ്മിനു, പൗളി വത്സൻ, മനോഹരിയമ്മ തുടങ്ങിയവരും ഈ ചിത്രത്തിൽ അഭിനയിക്കുന്നു.