യുഎസിന്റെ പരമാധികാരത്തെ ചോദ്യം ചെയ്തുള്ള അതിക്രമം വേണ്ട,ചൈനക്ക് അമേരിക്കയുടെ മുന്നറിയിപ്പ്

വാഷിങ്ടൻ . യുഎസിന്റെ പരമാധികാരത്തെ ചോദ്യം ചെയ്തുള്ള അതിക്രമം വേണ്ടെന്ന് ചൈനക്ക് അമേരിക്കയുടെ മുന്നറിയിപ്പ്. ചൈനയോട് വിട്ടുവീഴ്ചയ്ക്കില്ലെന്നും യുഎസ് പ്രസിഡന്റ് ജോ ബൈഡൻ പറഞ്ഞു. യുഎസ് പാർലമെന്റായ കോൺഗ്രസിന്റെ സംയുക്ത സമ്മേളനത്തിൽ ജനപ്രതിനിധി സഭയിൽ ബൈഡൻ നടത്തിയ പ്രസംഗത്തിൽ ചൈനയായിരുന്നു പ്രധാന വിഷയം.

ഏതെല്ലാം മേഖലയിൽ ചൈന മേധാവിത്വം ഉറപ്പിച്ചിട്ടുണ്ടോ അതിലെല്ലാം അമേരിക്ക മുന്നേറ്റം ഉറപ്പാക്കും – ജോ ബൈഡൻ പറഞ്ഞു. ‘വ്യവസായത്തിലും സാങ്കേതികവിദ്യയിലുമുൾപ്പെടെ എവിടെയെല്ലാം ചൈന മേധാവിത്വം ഉറപ്പിച്ചിട്ടുണ്ടോ, അവിടെയെല്ലാം അമേരിക്കൻ മുന്നേറ്റം ഉറപ്പാക്കാനുള്ള നിക്ഷേപനയമാണ് അമേരിക്ക സ്വീകരിച്ചിരിക്കുന്നതെന്ന്’ ഒരു മണിക്കൂർ നീണ്ട നയപ്രഖ്യാപന പ്രസംഗത്തിൽ ജോ ബൈഡൻ പറഞ്ഞു.

ചൈന പറത്തിവിട്ട ചാരബലൂൺ വെടിവച്ചിടാൻ വൈകിയെന്ന റിപ്പബ്ലിക്കൻ പാർട്ടിയുടെ വിമർശനങ്ങൾക്കിടെയാണ് ബൈഡൻ പ്രഖ്യാപനം. പിന്നീടാണ് റഷ്യയെ പോലും പ്രസം​ഗത്തിൽ ബൈഡൻ പരാമർശിക്കുന്നത്. ചൈനീസ് പ്രസിഡന്റ് ഷി ജിൻങ്ങിനു പകരമാകാൻ കഴിയുന്ന ലോകനേതാക്കൾ ആരുമില്ലെന്ന് ബൈഡൻ പറഞ്ഞു. യുഎസിന്റെ പരമാധികാരത്തെ ചോദ്യം ചെയ്തുള്ള അതിക്രമം വേണ്ട. നയപ്രഖ്യാപന പ്രസം​ഗത്തിൽ ജോ ബൈഡൻ ഓർമിപ്പിച്ചു. ഇതിനിടെ യുഎസിനോട് മത്സരിക്കാ‍ൻ ഭയമില്ലെന്ന് ചൈനീസ് വിദേശകാര്യമന്ത്രാലയം പ്രതികരിച്ചിരുന്നു.