സ്വന്തം കുടുംബക്കാര്‍ക്കും സുഹൃത്തുക്കള്‍ക്കുമൊപ്പം ഉല്ലാസയാത്ര നടത്താനുള്ള പദവിയല്ല ഗവര്‍ണറുടേത്, വി ശിവൻകുട്ടി

തിരുവനന്തപുരം: സംസ്ഥാനങ്ങള്‍ക്ക് ഗവര്‍ണര്‍ പദവി ആവശ്യമില്ലെന്ന് വിദ്യാഭ്യാസ വകുപ്പുമന്ത്രി വി. ശിവന്‍കുട്ടി. കഴിഞ്ഞ ഒരു വര്‍ഷത്തെ കണക്കെടുത്താല്‍ 70 ശതമാനം സമയവും ഗവര്‍ണര്‍ കേരളത്തില്‍ ഇല്ലായിരുന്നു. ആരോഗ്യപ്രശ്നം ഉണ്ടായിരുന്നെങ്കില്‍ റിപ്പബ്ലിക് ദിന പരേഡില്‍ മുഴുവന്‍ സമയവും പ്രസംഗം വായിച്ചതെങ്ങനെയാണ്.

പരേഡില്‍ മുഴുവന്‍ കേന്ദ്രസര്‍ക്കാരിനെ പുകഴ്ത്തിയാണ് സംസാരിച്ചത്. റിപ്പബ്ലിക് ദിന പരിപാടിയില്‍ കേരളത്തെ കുറിച്ച് ചുരുങ്ങിയ വാക്കുകള്‍ മാത്രമാണ് പറഞ്ഞത്. ജനാധിപത്യവിരുദ്ധമായ പദപ്രയോഗങ്ങളാണ് അദ്ദേഹം നടത്തിയത്.- മന്ത്രി പറഞ്ഞു.

കേന്ദ്രസര്‍ക്കാരിന്റെ പിന്തുണ ഉള്ളതുകൊണ്ട് എന്തും ചെയ്യും എന്ന നിലപാടാണ് ഗവര്‍ണര്‍ സ്വീകരിക്കുന്നത്. സ്വന്തം കുടുംബക്കാര്‍ക്കും സുഹൃത്തുക്കള്‍ക്കുമൊപ്പം ഉല്ലാസയാത്ര നടത്താനുള്ള പദവിയല്ല ഗവര്‍ണറുടേതെന്നും അതിനുള്ള പണം മുടക്കുന്നത് സംസ്ഥാന സര്‍ക്കാരാണെന്നും മന്ത്രി കുറ്റപ്പെടുത്തി. കാര്യവട്ടം ഗ്രീന്‍ഫീല്‍ഡ് സ്പോര്‍ട്സ് ഹബ്ബില്‍ നടക്കുന്ന അന്താരാഷ്ട്ര കായിക ഉച്ചകോടിയില്‍ പങ്കെടുക്കാന്‍ എത്തിയപ്പോഴായിരുന്നു മന്ത്രിയുടെ പരാമര്‍ശം.