ഒരുമിച്ച് കഞ്ഞി വിളമ്പി വര്‍ത്തമാനം പറഞ്ഞാണ് എന്നും അത്താഴം കഴിച്ചിരുന്നത് ; വാളയാറില്‍ മരിച്ച പെണ്‍കുട്ടികളുടെ അമ്മ

മക്കളോടൊപ്പമുള്ള ഓര്‍മകള്‍ പങ്കുവെച്ചിരിക്കുകയാണ് കുട്ടികളുടെ അമ്മ. ”എന്റെ മക്കളായതുകൊണ്ടു പറയുകയല്ല. ഇത്രയ്ക്ക് സ്‌നേഹമുള്ള കുട്ടികള്‍ ഉണ്ടാവില്ല. പാട്ടിനും ഡാന്‍സിനും സ്‌പോര്‍ട്‌സിനുമൊക്കെ സമ്മാനം വാങ്ങിയിട്ടുണ്ട്.

ഇളയവള്‍ പഠനത്തിലും ഒന്നാമതായിരുന്നു. ഒരുപാടു സ്‌നേഹിച്ചാണ് അവരെ വളര്‍ത്തിയത്. ഞങ്ങളുടെ സ്‌നേഹം കണ്ടില്ലെന്നുവച്ചു പോകാന്‍ എന്റെ മക്കള്‍ക്കു കഴിയില്ല. അഞ്ചു പാത്രങ്ങളില്‍ ഒന്നിച്ചു കഞ്ഞി വിളമ്ബി വര്‍ത്തമാനം പറഞ്ഞാണ് എന്നും അത്താഴം കഴിച്ചിരുന്നത്’ കണ്ണീരോടെ പെണ്‍കുട്ടികളുടെ അമ്മ പറഞ്ഞു.

കോണ്‍ക്രീറ്റ് പണിക്കു പോകുന്ന ദിവസം സൈറ്റില്‍ നിന്ന് പൊറോട്ടയോ ബിരിയാണിയോ ഒക്കെ കിട്ടും. അതു പൊതിഞ്ഞുകൊണ്ടു വന്നു മക്കളെ കഴിപ്പിക്കും. ഓണവും വിഷുവും വരുമ്‌ബോള്‍ പായസവും ഉപ്പേരിയുമുണ്ടാക്കി അവര്‍ക്കു ചെറിയൊരു സദ്യ കൊടുക്കും. കടം വാങ്ങിയിട്ടായാലും അവര്‍ക്ക് ഓണക്കോടി മുടക്കിയിട്ടില്ല.

കോണ്‍ക്രീറ്റ് പണിക്കു പോയാണ് മക്കളെ വളര്‍ത്തിയത്. ആ പണി ഇല്ലാതെ വരുമ്‌ബോള്‍ തൊഴിലുറപ്പു പണിക്കു പോകും. അതിന്റെ കൂലി ഇടയ്ക്ക് ഒന്നിച്ചേ കിട്ടൂ. ഒരുപാടു പ്രയാസങ്ങള്‍ ഉണ്ടെങ്കിലും മക്കളെ അതൊന്നും അറിയിച്ചിരുന്നില്ല. മൂത്ത മകള്‍ക്ക് എട്ടു മാസം പ്രായമുള്ളപ്പോഴാണു ഞാന്‍ രണ്ടാമതു വിവാഹിതയായത്. ചേട്ടന്‍ അവളെ സ്വന്തം മക്കളെക്കാള്‍ സ്‌നേഹിച്ചു. ‘അമ്മ പറഞ്ഞു.

ഒരിക്കലും ഇളയ കുട്ടി ആത്മഹത്യ ചെയ്യില്ലെന്ന് കുട്ടികളുടെ അമ്മ പറഞ്ഞു. മരിക്കുന്ന ദിവസം രാവിലെ എഴുന്നേറ്റ് തലേന്നു ഞാന്‍ കൊണ്ടുക്കൊടുത്ത പൊറോട്ട ചൂടാക്കി അനിയനും അമ്മമ്മയ്ക്കും നല്‍കി. ഞാനും അച്ഛനും പണിക്ക് ഇറങ്ങിയപ്പോള്‍ കൂടെവന്നു. അടുത്തുള്ള കടയില്‍നിന്ന് അനിയനും അവള്‍ക്കുമായി ബിസ്‌കറ്റ് വാങ്ങിക്കൊടുത്തുവിട്ടു. ചേച്ചി മരിച്ച സങ്കടം ഒഴികെ എന്റെ കുട്ടിക്ക് മറ്റൊരു പ്രശ്‌നമുള്ളതായി തോന്നിയിട്ടില്ല. അമ്മ വ്യക്തമാക്കി.