നാടിന്റെ ശാപമായിരുന്ന കുപ്പയംകുളം മാലിന്യമുക്തമാക്കി, ഷീബ സ്വാമിനാഥൻ നാളെ കേന്ദ്ര സർക്കാരിന്റെ അതിഥിയായി ചെങ്കോട്ടയിൽ

ന്യൂഡൽഹി: നാളെ ചെങ്കോട്ടയിലെ സ്വാതന്ത്ര്യദിനാഘോഷത്തിൽ കേരളത്തിൽ നിന്നും കുറച്ച് സാദാരണക്കാർ കൂടിയുണ്ട്. വാളയാർ കോങ്ങാംമ്പാറ സ്വദേശി ഷീബ സ്വാമിനാഥൻ ആണ് അത്തരമൊരു ഭാഗ്യം ലഭിച്ചവരിൽ ഒരാൾ. മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയുടെ ഭാഗമായി അമൃത് സരോവർ പദ്ധതിയിൽ ഉൾപ്പെടുത്തി കുളം നവീകരണം ഷീബയുടെ മേൽനോട്ടത്തിലായിരുന്നു നടന്നത്.

തൊഴിലുറപ്പു തൊഴിലാളി മേറ്റ് ആയ ഇവർ ഡൽഹിയിലെ സ്വാതന്ത്ര്യദിനാഘോഷത്തിൽ കേന്ദ്ര സർക്കാരിന്റെ ക്ഷണിക്കപ്പെട്ട അതിഥിയായ് നാളെ എത്തും. ഷീബയ്‌ക്കൊപ്പം തിരുവനന്തപുരം, പത്തനംതിട്ട, കൊല്ലം, ജില്ലകളിലെ 3 തൊഴിലുറപ്പു തൊഴിലാളികൾക്കും ക്ഷണം ലഭിച്ചിട്ടുണ്ട്. മുൻപ് ചെങ്കോട്ടയിലെ സ്വാതന്ത്ര്യദിനാഘോഷത്തിൽ അതിഥികളായി പങ്കെടുത്തിരുന്നത് സമൂഹത്തിന്റെ ഉന്നത പദവിയിൽ നിലകൊണ്ടിരുന്ന വിശിഷ്ട വ്യക്തികളാണ്.

നാടിന്റെ ശാപമായ മാലിന്യം കുമിഞ്ഞുകൂടി ഉപയോഗശുന്യമായ കുളത്തിന്റെ നവീകരണത്തിന് നേതൃത്വം നൽകിയതിലൂടെയാണ് ഷീബയ്‌ക്ക് അപൂർവ്വ അവസരം കൈവന്നത്. തനിക്ക് ലഭിച്ച ഈ അവസരത്തിൽ സന്തോഷവും അഭിമാനവുമുണ്ടെന്ന് ഷീബ പ്രതികരിക്കുകയുണ്ടായി. ഷീബയുടെ നേതൃത്വത്തിൽ അൻപതോളം തൊഴിലാളികൾ ചേർന്നാണു കുളം വൃത്തിയാക്കിയത്.

ഇതോടെ അമൃത് സരോവർ പദ്ധതിയിലെ മാതൃകാ പ്രവൃത്തിയായി കുപ്പയംകുളത്തിന്റെ പേരും എഴുതി ചേർക്കപ്പെട്ടു. കൂടാതെ പ്രദേശത്തെ വിവിധ ഉപയോഗ ശൂന്യമായ ജലാശയങ്ങളും ഈ സംഘം നവീകരിച്ചു. ഇതാണ് ഷീബ സ്വാമിനാഥൻ എന്ന വ്യക്തിയെ നാളെ കേന്ദ്ര സർക്കാരിന്റെ അതിഥിയായി ചെങ്കോട്ടയിൽ എത്തിച്ചത്.