സഞ്ചരിച്ചത് 110 സ്പീഡിൽ, വേഗം ഇനിയും കൂടും, വന്ദേഭാരത് ആദ്യ ട്രയൽ റൺ നടത്തിയ ലോക്കോ പൈലറ്റ് പറയുന്നു

കണ്ണൂർ: വന്ദേഭാരത് എക്‌സ്പ്രസിന്റെ ആദ്യ ട്രയൽ റൺ വിജയകരമായി പൂർത്തിയാക്കിയതിന്റെ നിറവിലാണ് ലോക്കോ പൈലറ്റ് എം ഐ കുര്യാക്കോസ്. 110 സ്പീഡിലാണ് സഞ്ചരിച്ചത്. ട്രാക്ക് നവീകരണം അടക്കമുള്ള കാര്യങ്ങൾ പൂർത്തിയാക്കിയാൽ വേഗത ഇരട്ടിയാക്കാൻ കഴിയുമെന്നും അദ്ദേഹം മാധ്യമങ്ങളോട് പറഞ്ഞു.

ഇന്ന് രാവിലെ 5.10-ന് തിരുവനന്തപുരം സെൻട്രൽ റെയിൽവെ സ്റ്റേഷനിലെ രണ്ടാം നമ്പർ പ്ലാറ്റ്‌ഫോമിൽ നിന്നും യാത്ര തിരിച്ച ട്രെയിൻ 7 മണിക്കൂർ 10 മിനിട്ടുകൊണ്ട് 2.20-ന് കണ്ണൂരിലെത്തി. ട്രയൽ റൺ വിജയകരമായി പൂർത്തിയാക്കിയതിന് പിന്നാലെ ലോക്കോ പൈലറ്റിന് വലിയ സ്വീകരണമാണ് കണ്ണൂരിൽ ലഭിച്ചത്.

തന്റെ ജീവിതത്തിൽ ഇങ്ങനെ ഒരു സ്വീകരണം ഇതാദ്യമാണെന്നും കുര്യാക്കോസ് പറഞ്ഞു. വന്ദേഭാരത് റെയിൽവേയുടെ മികച്ച കാൽവെപ്പാണ്,. വന്ദേഭാരത് യുസർ ഫ്രണ്ട്‌ലി ആണ്. കംപ്യൂട്ടർ കൺട്രോൾഡ് സിസ്റ്റമായതിനാൽ ഉപയോഗിക്കാൻ ഈസിയാണെന്നും അദ്ദേഹം പറഞ്ഞു. തിരുവനന്തപുരം ഡിവിഷനിലെ റെയിൽവേ ഉദ്യോഗസ്ഥരും ലോക്കോ പൈലറ്റുമാണ് ട്രയൽറണ്ണിൽ വന്ദേഭാരതിൽ ഉണ്ടായിരുന്നത്.

ഷൊർണൂരിൽ സ്റ്റോപ്പില്ലാത്തതിനാൽ പാലക്കാട് ഡിവിഷൻ ഉന്നത ഉദ്യോഗസ്ഥർ ഡിവിഷൻ ഉന്നത ഉദ്യോഗസ്ഥർ തൃശൂരിൽനിന്ന് കയറി. അവിടെനിന്ന് ക്രൂ ചേഞ്ചും ഉണ്ടായിരുന്നു.