അങ്ങനെയെങ്കിൽ പ്രഭുവിനോടൊപ്പം താമസിച്ച നയൻതാരയും മോശക്കാരിയല്ലേയെന്ന് വനിത

പീറ്റർ പോളുമായുള്ള മൂന്നാം വിവാഹത്തിന് പിന്നാലെ വനിത വിജയകുമാറിനെ തേടിവരുന്നത് നിരവധി വിവാദങ്ങളാണ്. ഇവരുടെ വിവാഹത്തിന് പിന്നാലെ പീറ്ററിന്റെ ആദ്യ ഭാര്യ എലിസബത്ത് ഹെലൻ രം​ഗത്തെത്തിയതാണ് വിവാദങ്ങൾക്ക് കാരണമായത്. എന്നാൽ അതിനിടെ ലേഡി സൂപ്പർസ്റ്റാർ നയൻതാരയുടെ പേര് വലിച്ചിട്ടത് വനിതയെ പുതിയ വിവാദത്തിൽ കൊണ്ടുവന്ന് എത്തിച്ചിരിക്കുകയാണ്.

തന്റെ മൂന്നാംവിവാഹവുമായി ബന്ധപ്പെട്ട ചർച്ചയിൽ കഴിഞ്ഞ ദിവസം ലൈവ് അഭിമുഖത്തിനിടെ നടിയും സംവിധായികയുമായ ലക്ഷ്മി രാമകൃഷ്ണനെ വനിത ചീത്ത വിളിച്ചിരുന്നു. ലക്ഷ്മിയുമായുള്ള പോരിനിടെയാണ് നയൻതാരയുടെ പേര് വലിച്ചിഴച്ച്‌ പുതിയ വിവാദങ്ങൾക്കുകൂടി താരം തുടക്കം കുറിച്ചത്.

‘ലക്ഷ്മി നാരായണൻ, കസ്തൂരി ശങ്കർ നിങ്ങളോടാണ് ചോദ്യം. അങ്ങനെയെങ്കിൽ പ്രഭുദേവയ്‌ക്കൊപ്പം താമസിച്ചിരുന്നപ്പോൾ നയൻതാരയും മോശം സ്ത്രീ ആയിരുന്നില്ലേ; അദ്ദേഹത്തിന്റെ ഭാര്യയും മൂന്ന് കുട്ടികളുടെ അമ്മയുമായ റംലത്ത് കോടതിയിലും മാധ്യമങ്ങൾക്ക് മുമ്ബിലും എത്തിയപ്പോൾ നിങ്ങൾ എന്തുകൊണ്ട് ശബ്ദിച്ചില്ല.’ എന്നാണ് വനിത ട്വീറ്റ് ചെയ്തത്.

ഇതോടെ നയൻതാരയുടെ ആരാധകർ വനിതയ്ക്കെതിരെ തിരിഞ്ഞു. നിങ്ങളുടെ സ്വകാര്യ പ്രശ്നത്തിലേക്ക് നയൻതാരയെ എന്തിനാണ് വലിച്ചിഴക്കുന്നത് എന്നായിരുന്നു ആരാധകരുടെ ചോദ്യം. നയൻതാരയെ തൊട്ടാൽ കളിമാറുമെന്നും താരത്തോട് മാപ്പു പറയാനും ആവശ്യപ്പെട്ട് നിരവധി കമന്റുകൾ വന്നു. സൈബർ ആക്രമണം രൂക്ഷമായതോടെ ട്വീറ്റ് നീക്കം ചെയ്യുകയും ട്വിറ്റർ അക്കൗണ്ട് ഡിലീറ്റ് ചെയ്യുകയും ചെയ്തു.