വട്ടമല വ്യൂ പോയിന്റിൽ നിന്ന് ഫോട്ടോയെടുക്കവെ താഴ്ചയിലേക്ക് വീണ് വിദ്യാർത്ഥിക്ക് പരിക്ക്

മലപ്പുറം : വിനോദസഞ്ചാരത്തിനെത്തിയ യുവാവ് ഫോട്ടെയെടുക്കവെ 100 അടി താഴ്ചയിലേക്ക് വീണ് പരിക്കേറ്റ്. കരുവാരക്കുണ്ട് സ്വദേശി ഷിജുവിന്റെ മകൻ മെൽവിൻ ടോം ആണ് താഴ്ചയിലേക്ക് വീണത്. താഴ്ചയിലേക്ക് വീണ യുവാവിന്റെ നിലവിളി കേട്ട പ്രദേശവാസികളാണ് അധികൃതരെ വിവരം അറിയിച്ചത്.

ഇന്നലെ വൈകിട്ട് ആറ് മണിയോടെ വട്ടമല വ്യൂ പോയിന്റിലാണ് സംഭവം. താഴ്ചയിലേക്ക് വീണ് വിദ്യാർത്ഥിയെ മണിക്കൂറുകൾ നീണ്ട രക്ഷാപ്രവർത്തനത്തിനൊടുവിലാണ് പുറത്തെത്തിച്ചത്. ബെംഗളൂരുവിൽ നിന്നും നഴ്‌സിംഗ് വിദ്യാർത്ഥിയായ യുവാവ് ക്രിസ്തുമസ് ആഘോഷത്തിന്റെ ഭാഗമായാണ് നാട്ടിലെത്തിയത്. തനിച്ചായിരുന്നു മെൽവിൻ വട്ടമല വ്യൂപോയിന്റിൽ നിന്നും ഫോട്ടോ എടുക്കാൻ പോയത്. ഉയരം കൂടിയ പാറപ്പുറത്ത് നിന്നും ഫോട്ടോ എടുക്കവെ തലചുറ്റി നൂറടിയിലേറെ താഴ്ചയുള്ള ഭാഗത്തേക്ക് വീഴുകയായിരുന്നു.

അംഗീകൃത വിനോദസഞ്ചാരകേന്ദ്രമല്ലാത്തതിനാലും ആന, കടുവ, എന്നീ വന്യജീവി ഭീഷണിയുള്ളതിനാലും വൈകുന്നേരങ്ങളിൽ ഇവിടേയ്‌ക്ക് അധികമാരും എത്താറില്ല. സാരമായി പരിക്കേറ്റ മെൽവിനെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.