നയന്‍താരയുമായുള്ള വിവാഹം എന്നാണെന്ന് ചോദ്യം, വിഘ്‌നേഷ് ശിവയുടെ മറുപടി വൈറല്‍

മലയാളികളുടെ പ്രിയപ്പെട്ട നടിയാണ് നയന്‍താര. തുടക്കം മലയാള സിനിമയിലൂടെ ആണെങ്കിലും അന്യഭാഷാ ചിത്രങ്ങളിലൂടെയാണ് നടി ഏറെ ശ്രദ്ധിക്കപ്പെട്ടത്. തമിഴ് സിനിമയിലെ ലേഡി സൂപ്പര്‍സ്റ്റാര്‍ എന്നാണ് നയന്‍താര അറിയപ്പെടുന്നത്. പലപ്പോഴും ഗോസിപ്പ് കോളങ്ങളിലും നടിയുടെ പേര് എത്തിയിരുന്നു. നടന്‍ ചിമ്പുവുമായുള്ള പ്രണയത്തിന്റെ പേരിലാണ് നയന്‍താര ആദ്യം ഗോസിപ്പ് കോളത്തില്‍ നിറഞ്ഞത്. പിന്നീട് പ്രഭു ദേവയുമായുള്ള ബന്ധവും വാര്‍ത്തയായിരുന്നു.

സംവിധായകന്‍ വിഘ്‌നേഷ് ശിവയാണ് നയന്‍താരയുടെ ഇപ്പോഴത്തെ ബോയ്ഫ്രണ്ട്. ഇവരുടെ വിവാഹം തെന്നിന്ത്യന്‍ സിനിമ ലോകം തന്നെ കാത്തിരിക്കുകയാണ്. പലപ്പോഴും ഇരുവരും വിവാഹിതര്‍ ആയെന്ന വാര്‍ത്തകളും ഗോസിപ് കോളങ്ങളില്‍ ഇടം പിടിച്ചിട്ടുണ്ട്. ഇപ്പോള്‍ വിവാഹത്തെ കുറിച്ചുള്ള ആരാധകന്റെ ചോദ്യത്തിന് വിഘ്‌നേഷ് നല്‍കിയ മറുപടിയാണ് ശ്രദ്ധേയമാകുന്നത്.

ഇന്‍സ്റ്റഗ്രാമില്‍ ആരാധകരുടെ ചോദ്യങ്ങള്‍ക്ക് ഉത്തരം നല്‍കുന്നതിന് ഇടയിലാണ് വിഘ്‌നേഷ് വിവാഹത്തെ കുറിച്ച് സംസാരിച്ചത്. ‘എന്താണ് നയന്‍താര മാഡത്തെ വിവാഹം ചെയ്യാത്തത്? ഞങ്ങള്‍ ആകാംക്ഷയോടെ കാത്തിരിക്കുന്നു..’ എന്നായിരുന്നു ഒരു ആരാധകന്‍ ചോദിച്ചത്. ‘വിവാഹത്തിനും മറ്റും വലിയ ചെലവ് ആകും ബ്രോ. അതുകൊണ്ട് വിവാഹത്തിനായി പണം സേവ് ചെയ്തു വയ്ക്കുന്നു, അതുപോലെ കൊറോണ പോവാന്‍ കാത്തിരിക്കുന്നു’ എന്നാണ് വിഘ്‌നേഷ് ഉത്തരം നല്‍കിയിരിക്കുന്നത്.

അതേസമയം, നേരത്തെ തമിഴ്‌നാട്ടിലെ ഒരു അമ്പലത്തില്‍ വച്ച് നയന്‍താരയും വിഘ്‌നേഷും വിവാഹിതരായി എന്ന് വാര്‍ത്തകള്‍ പ്രചരിച്ചിരുന്നു. എന്നാല്‍ ഇരുവരും ഈ വാര്‍ത്തകളോട് പ്രതികരിച്ചില്ല.