എനിക്കിഷ്ടമുള്ള ജീവിതമാണ് ഇപ്പോൾ ഞാൻ ജീവിക്കുന്നത്, ജീവിതം ഒന്നേയുള്ളൂ- വിജയ് യേശുദാസ്

മനോഹരമായ പാട്ടുകളേക്കാൾ കഴിഞ്ഞ കുറച്ചു നാളുകളായി വിജയ് യേശുദാസ് വിവാദങ്ങളുടെ കളിത്തോഴനാണ്. പൊതുവേ സാമൂഹിക വിഷയങ്ങളിലോ വ്യക്തിപരമായ കാര്യങ്ങളിലോ തുറന്ന ചർച്ചയ്‌ക്കോ സംവാദത്തിനോ ഇറങ്ങാത്ത പ്രകൃതക്കാരനാണ് വിജയ്. പക്ഷേ അത്രയൊന്നും ഇല്ലെങ്കിൽ പോലും വിജയ് യേശുദാസ് വിവാദങ്ങളിൽ നിറഞ്ഞു നിൽക്കാറുണ്ട്. വിവാഹമോചനക്കാര്യം പോലും വിജയ് എവിടെയും പരസ്യമായി പ്രഖ്യാപിച്ചിട്ടില്ല

ഗാന ലോകത്തേക്ക് വന്നപ്പോൾ, അച്ഛനോളം മികച്ച ഗായകനാകും എന്ന പ്രതീക്ഷയിലാണ് എല്ലാവരും വരവേറ്റത്. അത് എത്രത്തോളം വലിയ സമ്മർദ്ദമായിരുന്നു തനിക്ക് തുടക്കകാലത്ത് തന്നിരുന്നത് എന്ന് വിജയ് യേശുദാസ് പറയുന്നു. ആനീസ് കിച്ചണിൽ പങ്കെടുത്ത് സംസാരിക്കുകയായിരുന്നു ഗായകൻ.

അച്ഛൻ ഉണ്ടാക്കി വച്ച ലെഗസി അത് അച്ഛന്റേതാണ്. ആ ലേബലിൽ ഞാൻ അറിയപ്പെട്ടേക്കാം, അതിൽ സന്തോഷമുണ്ട്. അച്ഛന്റെ ആ പെരുമയെ ഞാൻ ബഹുമാനിക്കുകയും ചെയ്യുന്നു. പക്ഷെ വന്ന സംഗീത ലോകത്തേക്ക് വരുമ്പോഴേക്കും അച്ഛനുമായി താരതമ്യം ചെയ്യലാണ് സഹിക്കാൻ പറ്റാത്തത്. തുടക്കത്തിൽ അത് എനിക്ക് വലിയ രീതിയിലുള്ള ഫ്രസ്‌ട്രേഷൻ തന്നിരുന്നു. അച്ഛന്റെ പേര് ചീത്തയാക്കാൻ എന്തിനാണ് പാടുന്നത് എന്നൊക്കെ ചോദിച്ചുള്ള താരതമ്യപ്പെടുത്തലായിരുന്നു.

തുടക്കത്തിൽ ഒരെട്ടു വർഷം അത് ഞാൻ തുമന്നു. ഒരു ‘ഓടക്കുഴൽ വിളികേട്ടോ’ എന്ന പാട്ട് സംഭവിയ്ക്കുകയും അതിലൂടെ സംസ്ഥാന പുരസ്‌കാരം കിട്ടുകയും ചെയ്യുനന്ത് വരെ ആ പരിഹാസവും താരതമ്യപ്പെടുത്തലുകളും ഉണ്ടായിരുന്നു. പിന്നെ ആ ഉത്തരവാദിത്വം ഞാൻ തന്നെ എടുത്ത് മാറ്റി. എനിക്ക് എന്റേതായ ഐഡന്റിറ്റിയുണ്ട്, എന്റ വ്യക്തിത്വമുണ്ട്. ഞാൻ പാടുന്ന പാട്ട് കൂടുതൽ മികച്ചതാക്കാൻ പരമാവധി പരിശ്രമിക്കാം, അതിൽ നൂറ് ശതമാനം ആത്മാർത്ഥത കാണിക്കും പക്ഷെ വിധി എന്റെ കൈയ്യിലല്ല. അച്ഛന്റെ ശബ്ദത്തിൽ പാടാൻ എനിക്ക് സാധിക്കില്ലല്ലോ. അത് അച്ഛന്റെ നേട്ടമാണ്