എല്ലാം കൊള്ളാം ബട്ട് പടത്തിലേ നായകന്‍രെ മുഖത്ത് ഒന്നും വരാന്‍ പോകുന്നില്ലെന്ന് കമന്റ്, മറുപടി നല്‍കി വിനയന്‍

സിജു വിത്സനെ നായകനാക്കി വിനയന്‍ സംവിധാനെ ചെയ്യുന്ന പുതിയ ചിത്രമാണ് പത്തൊമ്പതാം നൂറ്റാണ്ട്. ചിത്രത്തിന്റേതായി പുറത്തെത്തിയ പോസ്റ്ററുകളും മറ്റും സോഷ്യല്‍ മീഡിയകളില്‍ വൈറലായിരുന്നു. പത്തൊമ്പതാം നൂറ്റാണ്ട് പുറത്ത് എത്തുന്നതോടെ സിജു വിത്സന്‍ സൂപ്പര്‍താര പദവിയിലേക്ക് എത്തുമെന്ന് വിനയന്‍ നേരത്തെ പറഞ്ഞിരുന്നു.

നവോത്ഥാന നായകന്‍ ആറാട്ടുപുഴ വേലായുധ പണിക്കര്‍ എന്ന നായക വേഷമാണ് ചിത്രത്തില്‍ സിജു വിത്സന്‍ അവതരിപ്പിക്കുന്നത്. ഇപ്പോള്‍ സിജുവിനെതിരെ പ്രത്യക്ഷപ്പെട്ട ഒരു കമന്റിന് മറുപടി നല്‍കി രംഗത്ത് എത്തിയിരിക്കുകയാണ് വിനയന്‍. ”എല്ലാം കൊള്ളാം ബട്ട് പടത്തിലേ നായകന്‍ താങ്കള്‍ എത്ര കടിപ്പിച്ചാലും ആ മുഖത്ത് ഒന്നും വരാന്‍ പോകുന്നില്ല” എന്നാണ് സിജുവിനെ ഇകഴ്ത്തി കൊണ്ടുള്ള ഒരു കമന്റ്.

എന്നാല്‍ സംവിധായകന്‍ എന്ന നിലയില്‍ നടനിലുള്ള തന്റെ ആത്മവിശ്വാസം വെളിപ്പെടുത്തുന്ന രീതിയിലാണ് വിനയന്റെ കമന്റ്. ”ഈ സിനിമ കണ്ടു കഴിയുമ്പോള്‍ മാറ്റിപ്പറയും.. രഞ്ജിത് സിജുവിന്റെ ഫാനായി മാറും ഉറപ്പ്..” എന്നാണ് വിനയന്‍ കമന്റിന് നല്‍കിയിരിക്കുന്ന മറുപടി.