ഐഫോൺ വിവാദത്തിൽ വിനോദിനിയെ ഇന്ന് ചോദ്യം ചെയ്‌തേക്കും

സ്വർണക്കടത്ത് കേസിൽ സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണൻ്റെ ഭാര്യ വിനോദിനിയെ കസ്റ്റംസ് ഇന്ന് ചോദ്യം ചെയ്തേക്കും. ഇന്ന് ഹാജരാകണമെന്ന് ആവശ്യപ്പെട്ടു അന്വേഷണ സംഘം വിനോദിനിയ്ക്ക് നോട്ടീസ് നൽകിയിട്ടുണ്ട്. എന്നാൽ അവർ ഇന്ന് ഹാജരാകുമോ എന്നതില്‍ കസ്റ്റംസിന് നിലവിൽ അറിയിപ്പൊന്നും ലഭിച്ചിട്ടില്ല.

കേസിലെ മുഖ്യപ്രതി സ്വപ്ന സുരേഷിന് കോഴയായി ലഭിച്ച ഐ ഫോണുകളിലൊന്ന് ഉപയോഗിച്ചിരുന്നത് വിനോദിനി ബാലകൃഷ്ണനാണെന്ന് കസ്റ്റംസ് കണ്ടെത്തിയിരുന്നു. യുഎഇ കോണ്‍സുല്‍ ജനറലിന് നല്‍കിയ ഐഫോണ്‍ എങ്ങനെ വിനോദിനി ബാലകൃഷ്ണന്റെ കയ്യില്‍ എത്തിയെന്നാണ് കസ്റ്റംസ് പരിശോധിക്കുന്നത്. ഇക്കാര്യത്തില്‍ വ്യക്തതയുണ്ടാക്കുന്നതിനാണ് കൊച്ചിയിലെ കസ്റ്റംസ് ഓഫീസില്‍ ഹാജരാകാന്‍ അന്വേഷണ സംഘം ആവശ്യപ്പെട്ടത്. കുറച്ചു നാൾ ബിനീഷ് കോടിയേരിയും ഐ ഫോൺ ഉപയോഗിച്ചതായി കണ്ടെത്തിയതിനാൽ കൊച്ചി, ബെംഗളുരു ഇഡി യൂണിറ്റുകളും വിനോദിനിയെ ചോദ്യം ചെയ്തേക്കും.