വിഷ്ണുപ്രിയയെ കഴുത്തറുത്ത് കൊലപ്പെടുത്തിയത് ആഴ്ചകൾ നീണ്ട ആസൂത്രണത്തിന് ഒടുവിൽ ; കുറ്റപത്രം സമർപ്പിച്ചു

കണ്ണൂർ : പ്രണയ ബന്ധത്തിൽ നിന്നും പിന്മാറിയതിനെ തുടർന്ന് പാനൂരിൽ പെൺകുട്ടിയെ കഴുത്തറുത്ത് കൊലപ്പെടുത്തിയ സംഭവത്തിൽ പ്രതി ശ്യാംജിത്ത് നടത്തിയത് ആഴ്ചകൾ നീണ്ട ആസൂത്രണം. കേസിന്റെ കുറ്റപത്രം സമർപ്പിച്ചു. കൊലയ്‌ക്ക് പിന്നിൽ പ്രണയ പകയാണെന്ന് കുറ്റപത്രത്തിൽ പറയുന്നു. ആഴ്ചകൾ നീണ്ട ആസൂത്രണത്തിന് ശേഷമായിരുന്നു പാനൂർ സ്വദേശിനി വിഷ്ണു പ്രിയയെ ശ്യാംജിത്ത് കൊലപ്പെടുത്തിയതെന്ന് കുറ്റപത്രത്തിൽ പറയുന്നു

വിഷ്ണുപ്രിയ ബന്ധത്തിൽ നിന്നും പിന്മാറിയതിന്റെ വൈരാഗ്യത്തിലാണ് വിഷ്ണു പ്രിയയെ കൊലപ്പെടുത്തിയത്. പെൺകുട്ടിയെ ശ്യാംജിത്ത് വീട്ടിൽ കയറി കൊലപ്പെടുത്തിയത് ഒക്ടോബർ 22 നായിരുന്നു. ആരുമില്ലാത്ത സമയത്ത് വീട്ടിൽ എത്തിയ ഇയാൾ വിഷ്ണു പ്രിയയെ കഴുത്തറുത്ത് കൊലപ്പെടുത്തുകയായിരുന്നു. സംഭവം നടന്ന് ഒന്നര മാസങ്ങൾക്കുള്ളിൽ അന്വേഷണ സംഘത്തിന് കുറ്റപത്രം സമർപ്പിക്കാനായി.

കൊലപാതകം നടന്ന് മണിക്കൂറുകൾക്കുള്ളിൽ തന്നെ പോലീസ് ശ്യാംജിത്തിനെ പിടികൂടിയിരുന്നു. ഇതിന് പുറമേ തെളിവ് ശേഖരണം വേഗത്തിൽ പൂർത്തിയാക്കാനും അന്വേഷണ സംഘത്തിന് കഴിഞ്ഞു. ആദ്യം മുതലേ അന്വേഷണത്തിനോട് പ്രതി പൂർണ്ണമായും സഹകരിച്ചിരുന്നു. ചോദ്യംചെയ്യലിൽ പ്രതി പറഞ്ഞ കാര്യങ്ങൾ പോലീസിനെ പോലും ഞെട്ടിച്ചിരുന്നു. താൻ ചെയ്ത കുറ്റത്തിന് കിട്ടാൻ പോകുന്ന പരമാവധി ശിക്ഷയെക്കുറിച്ച് പ്രതിക്ക് പൂർണ്ണ ബോദ്യമുണ്ടായിരുന്നു.