മരിക്കുംമുന്‍പ് വിശ്വനാഥന്‍ പോലീസിൽ ബന്ധപ്പെടാൻ ശ്രമിച്ചിരുന്നു ; തെളിവുകള്‍ ലഭിച്ചു

കോഴിക്കോട്: ആദിവാസി യുവാവ് വിശ്വനാഥന്‍ ജീവനൊടുക്കുന്നതിന് മുൻപ് പോലീസിൽ ബന്ധപ്പെടാൻ ശ്രമിച്ചിരുന്നതായി തെളിവുകള്‍ലഭിച്ചു. മെഡിക്കല്‍ കോളേജ് ആശുപത്രിയില്‍ നിന്ന് കരഞ്ഞുകൊണ്ട് പുറത്തേക്ക് ഓടിപ്പോവും മുന്‍പാണ് യുവാവ് പോലീസിനെ വിളിക്കാൻ ശ്രമിച്ചത്. മൂന്നുതവണ വിശ്വനാഥന്‍ പോലീസ് സഹായത്തിനായി വിളിച്ചു.

വിശ്വനാഥന്‍ പോലീസ് കണ്‍ട്രോള്‍ റൂം നമ്പറിലേക്ക് അര്‍ദ്ധരാത്രി 12.05,12.06,12.09 എന്നിങ്ങനെ മൂന്ന് തവണ വിളിച്ചു. മൂന്നുതവണയും കോള്‍ പെട്ടെന്ന് കട്ടായി. തിരുവന്തപുരത്തെ കണ്‍ട്രോള്‍ റൂമിലേക്കാണ് കോള്‍ എത്തിയത്. ആള്‍ക്കൂട്ടത്തില്‍ അപമാനിതനായതിനാല്‍ പോലീസിന്റെ സഹായം തേടിയാകും യുവാവ് വിളിച്ചത് എന്ന നിഗമത്തിലാണ് പോലീസ്.

സംഭവം നടന്ന് അടുത്ത ദിവസമാണ് വിശ്വനാഥനെ തൂങ്ങി മരിച്ച നിലയില്‍ കണ്ടെത്തിയത്. അന്ന് രാത്രി ആശുപത്രിയില്‍ സംഭവിച്ച കാര്യങ്ങളെക്കുറിച്ച് അറിയാമെന്ന് കരുതുന്ന രണ്ട് പേരെ കണ്ടെത്താന്‍ വയനാട്ടിലാണ് അന്വേഷണ സംഘം നിലവില്‍ ഉള്ളത്. വിശ്വനാഥന്‍ ഇവരുമായി സംസാരിക്കുന്നതിന്റെ ദൃശ്യങ്ങള്‍ കണ്ടെത്തിയതിന്റെ അടിസ്ഥാനത്തിൽ ഇവരെ പോലീസ് തിരയുകയാണ്.