വിഴിഞ്ഞം സമരം നൂറാം ദിവസത്തിലേക്ക്; വള്ളം കത്തിച്ച് സമരം

തിരുവനന്തപുരം. വിഴിഞ്ഞം തുറമുഖത്തിനെതിരെ ലത്തീന്‍ അതിരൂപതയുടെ നേതൃത്വത്തില്‍ നടക്കുന്ന സമരം 100 ദിവസത്തിലേക്ക് കടക്കുമ്പോള്‍ പ്രദേശത്ത് സംഘര്‍ഷം. വിഴിഞ്ഞം തുറമുഖത്തിന്റെ മുല്ലൂരിലെ പ്രധാന കവാടത്തിന്റെ പൂട്ട് തകര്‍ത്ത് പ്രതിഷേധക്കാര്‍ പദ്ധതി പ്രദേശത്തേക്ക് കടന്നു. കടലിലൂടെ വള്ളത്തിലെത്തിയ പ്രതിഷേധക്കാര്‍ പദ്ധതി പ്രദേശത്ത് പ്രതിഷേധിച്ചു. പ്രതിഷേധ സൂചകമായി വള്ളം കത്തിച്ചു.

വ്യാഴാഴ്ച രാവിലെ 8.30 മുതല്‍ പ്രതിഷേധക്കാര്‍ മുല്ലൂരിലെ സമരപന്തലില്‍ എത്തി. പിന്നീട് ബാരിക്കേഡുകള്‍ തള്ളിമാറ്റിയ പ്രതിഷേധക്കാര്‍ പ്രദേശത്തേക്ക് കടക്കുകയായിരുന്നു. ഏഴ് ആവശ്യങ്ങള്‍ ഉന്നയിച്ചാണ് സമരം നടക്കുന്നത്. തുറമുഖ നിര്‍മാണം നിര്‍ത്തിവെച്ച് തീരശോഷണത്തെക്കുറിച്ച് പഠിക്കണമെന്ന ആവശ്യം ഒഴികെ ബാക്കി എല്ലാ ആവശ്യങ്ങളും സര്‍ക്കാര്‍ അംഗീകരിച്ചിരുന്നു.

അതേസമയം തുറമുഖ നിര്‍മ്മാണം നിര്‍ത്തിവെച്ച് പഠനം നടത്തണമെന്ന ആവശ്യത്തില്‍ പ്രതിഷേധക്കാര്‍ ഉറച്ച് നില്‍ക്കുകയാണ്. വാടക വീട്ടില്‍ താമസിക്കുന്നവര്‍ക്ക് സര്‍ക്കാര്‍ നല്‍കുന്ന തുക അപര്യാപ്തമാണെന്നും പ്രതിഷേധക്കാര്‍ പറയുന്നു. പ്രതിഷേധ സാഹചര്യം കണക്കിലെടുത്ത് 1000 പോലീസുകാരെ സ്ഥലത്ത് വിന്യസിച്ചിട്ടുണ്ട്. സമരം നടക്കുന്നതിനാല്‍ മുതലപ്പൊഴി വഴി വിഴിഞ്ഞത്തേക്ക് നിര്‍മാണ സാമഗ്രികള്‍ എത്തുന്നത് തടസ്സപ്പെട്ടേക്കും.