KSU സംസ്ഥാന ഭാരവാഹി പട്ടികയില്‍ അതൃപ്തി, മേല്‍നോട്ടചുമതല ഒഴിഞ്ഞ് വി.ടി ബല്‍റാം

തിരുവനന്തപുരം : KSU സംസ്ഥാന ഭാരവാഹി പട്ടിക തയ്യാറാക്കിയത് പുനഃസംഘടനാ മാനദണ്ഡങ്ങള്‍ പാലിക്കാതെ എന്ന് ആരോപിച്ച് സംസ്ഥാന കെ.എസ്.യുവിന്റെ മേല്‍നോട്ടചുമതല വഹിച്ചിരുന്ന കോണ്‍ഗ്രസ് നേതാവ് വി.ടി ബല്‍റാമും അഡ്വ. ജയന്തും സ്ഥാനമൊഴിഞ്ഞു. പട്ടികയില്‍ സംസ്ഥാന കോണ്‍ഗ്രസ് നേതൃത്വം അതൃപ്തി അറിയിച്ചു.

ചുമതല ഒഴിയുന്നതായി കാട്ടി വി.ടി ബല്‍റാമും അഡ്വ. ജയന്തും ശനിയാഴ്ച കെ. സുധാകരന് കത്ത് നല്‍കി. കെ.എം. അഭിജിത്തിനെ മാറ്റി അലോഷ്യസ് സേവിയറിനെ അധ്യക്ഷസ്ഥാനാക്കിയിരുന്നു. എന്നാല്‍, ഇതിനുശേഷം സംസ്ഥാന ഭാരവാഹികളെ നിശ്ചയിക്കുന്നതുമായി ബന്ധപ്പെട്ട ചര്‍ച്ചകള്‍ ഏറെ നീണ്ടു. നിലവില്‍ ഇപ്പോള്‍ പുനഃസംഘടനാ പട്ടികയ്ക്ക് അംഗീകാരമായെങ്കിലും പുറത്തുവന്നിരിക്കുന്നത് ഒരു ജംബോ പട്ടികയാണെന്നാണ് ആരോപണം ഉയര്‍ന്നിരിക്കുന്നത്.

ബല്‍റാമും ജയന്തും നല്‍കിയ പട്ടികയില്‍ 45 പേര്‍ മാത്രമായിരുന്നു. ഉണ്ടായിരുന്നത്. എന്നാൽ എന്‍.എസ്.യു.ഐ അംഗീകരിച്ച പട്ടികയില്‍ 94 പേരുണ്ട് ഇതാണ് എതിർപ്പുകൾക്ക് ഇടയാക്കിയയത്. അലോഷ്യസ് സേവറിനൊപ്പം രണ്ട് വൈസ് പ്രസിഡന്റുമാരായിരുന്നു നേരത്തെ നിയമിതരായത്.

എന്നാല്‍, പുതിയ പട്ടികയില്‍ ഇരുവരെയും സീനിയര്‍ വെസ് പ്രസിഡന്റുമാരായി ഉയര്‍ത്തുകയും മറ്റ് നാല് പേരെ വൈസ് പ്രസിഡന്റുമാരായി നിയമിക്കുകയുമായിരുന്നു. ഇതോടെ നേതൃത്വത്തിനുള്ളിൽ പുകച്ചിലുണ്ടായി. പ്രശ്‌നം സംസ്ഥാന കെ.പി.സി.സി അധ്യക്ഷന്‍ കെ. സുധാകരന്‍ ഹൈക്കമാന്‍ഡിനെ അറിയിച്ചു. അഞ്ച് ദിവസത്തിനകം പരിഹാരമുണ്ടായില്ലെങ്കില്‍ കടുത്ത നടപടികളിലേക്ക് കടക്കുമെന്നും സുധാകരന്‍ വ്യക്തമാക്കി.