അധികാരത്തിലെത്തിയാൽ ഗുണനിലവാരമുള്ള മദ്യം കുറഞ്ഞ വിലയ്ക്ക് നൽകും, പവൻ കല്യാൺ

ഹൈദാരാബാദ്. ആന്ധ്രാപ്രദേശിൽ ജെഎസ്പി-ടിഡിപി സഖ്യം അധികാരത്തിൽ വന്നാൽ നേരത്തെയുള്ളതുപോലെ കുറഞ്ഞ വിലയ്ക്ക് ഗുണനിലവാരമുള്ള മദ്യം നൽകുമെന്ന് പവൻ കല്യാൺ. സ്ത്രീകളും ഗ്രാമപഞ്ചായത്തുകളും തീരുമാനിച്ചാൽ ചില ഗ്രാമങ്ങളിൽ മദ്യം നിരോധിക്കുമെന്നും അദ്ദേഹം വാഗ്ദാനം ചെയ്തു.

തെലുങ്കുദേശം പാർട്ടിയുമായി സഖ്യമുണ്ടാക്കിയാണ് നിയമസഭ തെരഞ്ഞെടുപ്പില്‍ ജനസേനാ പാർട്ടി മത്സരിക്കുന്നത്. നിലവിൽ ജഗൻ സർക്കാരിന്‍റെ കീഴിൽ ആന്ധ്രയില്‍ മദ്യവിൽപനയ്ക്ക് നിയന്ത്രണമുണ്ട്.

“മദ്യം നിരോധിക്കുമെന്ന് ജഗൻ ഉറപ്പുനൽകിയിരുന്നു, എന്നാൽ അദ്ദേഹത്തിന്‍റെ സർക്കാർ പകരം വിലകൂട്ടി ആയിരക്കണക്കിന് കോടി രൂപയുടെ വരുമാനം ഉണ്ടാക്കി.തെറ്റായ വാഗ്ദാനങ്ങള്‍ നൽകി ആരെയും തെറ്റിദ്ധരിപ്പിക്കാൻ ഞാൻ ആഗ്രഹിക്കുന്നില്ല. ഞങ്ങൾ സർക്കാർ രൂപീകരിച്ച് ഒരു മാസത്തിനകം നല്ല നിലവാരമുള്ള മദ്യം കുറഞ്ഞ വിലയ്ക്ക് നൽകും.

ആളുകൾ കുടിക്കാൻ പോകുകയാണെങ്കിൽ, കുറഞ്ഞത് അവർ നല്ല മദ്യമെങ്കിലും കഴിക്കണം, ”വ്യാഴാഴ്ച ഏലൂർ ജില്ലയിലെ കൈകലൂരിൽ നടന്ന സമ്മേളനത്തെ അഭിസംബോധന ചെയ്തുകൊണ്ട് പവന്‍ കല്യാണ്‍ പറഞ്ഞു.സ്ത്രീകൾക്ക് അവരുടെ ഗ്രാമങ്ങളിൽ മദ്യം നിരോധിക്കണമെങ്കിൽ പഞ്ചായത്തിന് തീരുമാനിക്കാം, ഞങ്ങൾ അതിനെ പിന്തുണയ്ക്കുകയും വികസന സംരംഭങ്ങൾ ഏറ്റെടുക്കുകയും ചെയ്യുമെന്നും അദ്ദേഹം കൂട്ടിച്ചേർത്തു.