പൂജാരി പാതി നഗ്‌നനായി ക്ഷേത്രത്തിൽ നിൽക്കുമ്പോൾ ഭക്തർ മാന്യമായി വസ്ത്രം ധരിക്കണമെന്ന് പറയുന്നത് എന്തിന്- തൃപ്തി ദേശായി

ക്ഷേത്ര ദർശനത്തിന് എത്തുന്ന ഭക്തർ മാന്യമായി വസ്ത്രം ധരിക്കണമെന്ന തീരുമാനത്തിനെതരെ തൃപ്തി ദേശായി രം​ഗത്ത്. ശബരിമലയിൽ പ്രവേശിക്കണമെന്ന ആവശ്യവുമായി തൃപ്തി കേരളത്തിലെത്തിയതൊക്കെ വൻ വാർത്തയായിരുന്നു. പൂജാരി പാതി നഗ്‌നനായി ക്ഷേത്രത്തിൽ നിൽക്കുമ്പോൾ ഭക്തർ മാന്യമായി വസ്ത്രം ധരിക്കണമെന്ന് പറയുന്നത് എന്തിനാണെന്ന് തൃപ്തി ദേശായി ചോദിച്ചു.

ഭക്തർ മാന്യമായി വസ്ത്രം ധരിച്ച് വരണം എന്ന ബോർഡുകൾ അപമാനകരമാണെന്നും എത്രയും പെട്ടെന്ന് അത്തരം ബോർഡുകൾ എടുത്തുമാറ്റണമെന്നും തൃപ്തി ആവശ്യപ്പെട്ടു. ഭരണഘടന ഉറപ്പുനൽകുന്ന ആവിഷ്‌ക്കാര സ്വാതന്ത്ര്യത്തിന്റെ ലംഘനമാണ് ക്ഷേത്ര ട്രസ്റ്റ് നടത്തിക്കൊണ്ടിരിക്കുന്നതെന്നും അവർ പറഞ്ഞു.

ബോർഡ് എടുത്തുമാറ്റാൻ ട്രസ്റ്റ് തയ്യാറായില്ലെങ്കിൽ താനും മറ്റ് ആക്ടിവിസ്റ്റുകളും മഹാരാഷ്ട്രയിൽ നേരിട്ടെത്തി എടുത്തുമാറ്റുമെന്നും തൃപ്തി പറഞ്ഞു. ഇന്ത്യയിൽ, ഭരണഘടന തങ്ങളുടെ പൗരന്മാർക്ക് അഭിപ്രായ സ്വാതന്ത്ര്യം നൽകിയിട്ടുണ്ട്, ആ അവകാശമനുസരിച്ച്, എന്ത് സംസാരിക്കണം, എന്ത് ധരിക്കണം എന്നത് ഒരാളുടെ വ്യക്തിപരമായ തീരുമാനമാണ് അവർ പറഞ്ഞു.

ഇന്ത്യയിലെ പ്രശസ്ത ലിംഗസമത്വ പ്രവർത്തകയും ഭൂമാത റാൻ രാഗിണി എന്ന ഒരു സംഘടനയുടെ സ്ഥാപക നേതാവാണ് തൃപ്തി. ഞാനും വിശ്വാസിയാണ്, എന്നാൽ അന്ധമായ വിശ്വാസമല്ല എനിക്കുള്ളതെന്ന് പറയുന്ന തൃപ്തി, സ്ത്രീവിവേചനത്തിനെതിരേയും സ്ത്രീവിമോചനത്തിനായുമായി പോരാടുന്ന വ്യക്തിയാണ്. വർഷങ്ങൾക്ക് മുൻപ് കോൺഗ്രസിന് വേണ്ടി മത്സരിച്ച് പരാജയപ്പെട്ടതോടെ ആണ് രാഷ്ട്രീയം ഉപേക്ഷിച്ചത്.