വരുമാനം പറയാത്ത ഭർത്താവിനെ ഭാര്യ വിവരാവകാശ നിയമം കൊണ്ട് കുടുക്കി.

ന്യൂഡൽഹി. സ്വന്തം വരുമാനം എത്രയെന്നു പറയാത്ത ഭർത്താവിനെ ഒടുവിൽ ഭാര്യ വിവരാവകാശ നിയമം വെച്ച് കുടുക്കി. ഭാര്യ പല തവണ ‘നിങ്ങൾക്കെത്ര രൂപ വരുമാനമുണ്ടെന്നു’ ഭർത്താവിനോട് ചോദിച്ചു നോക്കി. അപ്പോഴൊക്കെ നീ അതൊന്നും അറിയേണ്ടെന്നായിരുന്നു ഭർത്താവിന്റെ മറുപടി. എന്നാൽ പിന്നെ അതൊന്നു അറിയണമല്ലോ എന്ന വാശിയിലായി ഭാര്യ. ഉത്തർ പ്രദേശിലെ ബറെയ്‌ലിയിൽ ആണ് സംഭവം നടന്നിരിക്കുകയാണ്.

തന്റെ ഭർത്താവിനോട് ചോദിച്ചിട്ട് വരുമാനം എത്രയാണെന്ന് അറിയാത്തതുകൊണ്ട് ഭാര്യ വിവരാവകാശ നിയമപ്രകാരം അതറിയാൻ നിവേദനം നൽക്കുകയായിരുന്നു. ഏറെ തടസങ്ങൾക്കൊടുവിൽ കേന്ദ്ര വിവരാവകാശ കമ്മിഷൻ 15 ദിവസത്തിനകം വരുമാനം അറിയിക്കാൻ ഉത്തരവിടുകയും ഉണ്ടായി.

സഞ്ജു ഗുപ്‌ത എന്ന യുവതി ബറെയ്‌ലിയിലെ ആദായ നികുതി ഓഫീസിലെ സെൻട്രൽ പബ്ളിക് ഇൻഫർമേഷൻ ഓഫീസറോട് തന്റെ ഭർത്താവിന്റെ വരുമാനം അറിയാൻ വിവരാവകാശ നിയമപ്രകാരം അപേക്ഷ എഴുതി നൽകുകയായിരുന്നു. എന്നാൽ ഭർത്താവ് തയ്യാറാകാത്ത തിനാൽ ഇത് നൽകാനാവില്ല എന്ന് ഓഫീസർ തുടർന്ന് മറുപടി നൽകി.

തുടർന്ന് സഞ്ജു ഗുപ്‌ത ഫസ്‌റ്റ് അപലൈറ്റ് അതോറിറ്റിയുടെ സഹായം തേടി. എന്നാൽ അവിടെയും യുവതിയ്‌ക്ക് അനുകൂലമായ വിധി ഉണ്ടായില്ല. തുടർന്ന് കേന്ദ്ര വിവരാവകാശ കമ്മിഷനിൽ യുവതി അപ്പീൽ നൽക്കുകയായിരുന്നു പിന്നെ. ഇതോടെ നോട്ടീസ് ലഭിച്ച് 15 ദിവസത്തിനകം ഭർത്താവിന്റെ നികുതി വിധേയമായ വരുമാനവും മൊത്ത വരുമാനവും ഭാര്യയെ അറിയിക്കാൻ കമ്മിഷൻ ഉത്തരവിട്ടിരിക്കുകയാണ്.