നെറ്റിയില്‍ പേര് ടാറ്റൂ ചെയ്ത് ഭര്‍ത്താവിനോടുള്ള പ്രണയം പറഞ്ഞു ഭാര്യ,വൈറലായി വീഡിയോ

പ്രണയത്തിന് കണ്ണും മൂക്കും ഇല്ലെന്നല്ലേ പറയാറ്. മിക്കപ്പോഴും അത് സത്യമാണെന്ന് തോന്നിക്കുന്ന സംഭവങ്ങളാണ് റിപ്പോർട്ടുകളായി വരുന്നത്. പ്രണയത്തിന്റെ കാര്യത്തിൽ മറ്റുള്ളവർ പറയുന്നതൊന്നും തങ്ങളെ ബാധിക്കുന്ന വിഷയമേ അല്ല എന്ന് ചിന്തിക്കുന്ന പ്രണയിതാക്കളുടെ വീഡിയോ സോഷ്യൽ മീഡിയകളിൽ ഇപ്പോൾ വൈറലായിരിക്കുകയാണ്. തന്‍റെ ഭര്‍ത്താവിന്‍റെ പേര് നെറ്റിയില്‍ പച്ചകുത്തിയാ യിരുന്നു ഒരു യുവതി തന്‍റെ സ്നേഹം പ്രകടിപ്പിച്ചിരിക്കുന്നത്.

യുവതി നെറ്റിയില്‍ പേര് പച്ച കുത്തുന്ന വീഡിയോ ഇതിനകം വൈറലായി. നിരവധി പേര്‍ കമന്‍റുമായെത്തി. കിംഗ് മേക്കർ ടാറ്റൂ സ്റ്റുഡിയോ എന്ന ഇന്‍സ്റ്റാഗ്രാം അക്കൗണ്ടില്‍ നിന്നാണ് വീഡിയോ പങ്കുവയ്ക്കപ്പെട്ടത്. മാര്‍ച്ച് 18 ന് പങ്കുവയ്ക്കപ്പെട്ട വീഡിയോ ഇതിനകം രണ്ടര ലക്ഷത്തിന് മേലെ ആളുകള്‍ കണ്ടുകഴിഞ്ഞു.

ബെംഗളൂരുവിൽ ഉള്ള കിംഗ് മേക്കർ ടാറ്റൂ സ്റ്റുഡിയോയുടെ സോഷ്യൽ മീഡിയ അക്കൗണ്ടിൽ നിന്നാണ് വീഡിയോ ഇൻസ്റ്റാഗ്രാമിൽ പങ്കുവെച്ചിരിക്കുന്നത്. കസേരയിൽ ഇരിക്കുന്ന ഒരു യുവതിയുടെ നെറ്റിയില്‍ അവരുടെ ഭര്‍ത്താവിന്‍റെ പേര് എഴുതിയ ഒരു പേപ്പര്‍ പതിപ്പിക്കുന്നിടത്ത് നിന്നാണ് വീഡിയോയുടെ ആരംഭം. തുടര്‍ന്ന് ഇതിന്‍റെ കാര്‍ബണ്‍കോപ്പി നെറ്റിയില്‍ വരയ്ക്കുന്നു. ടാറ്റൂ ചെയ്യുന്ന സൂചി നെറ്റിയില്‍ വേദന പടര്‍ത്തുമ്പോള്‍ ടാറ്റൂ ആര്‍ട്ടിസ്റ്റിന്‍റെ കൈ പിടിച്ച് യുവതി എന്തോ പറയുന്നതും വീഡിയോയില്‍ കാണാവുന്നതാണ്.

സോഷ്യൽ മീഡിയയിൽ വീഡിയോ വൈറലായതോടെ ചിലർ ഇവർക്കെതിരെ രംഗത്ത് വന്നിട്ടുണ്ട്. ഇത് കുറച്ച് കടന്ന കയ്യായിപ്പോയെന്നു ചിലര്‍ കമാറ്റുകൾ ഇട്ടിട്ടുണ്ട്. ചിലര്‍ ഡിസ്‍ലൈക്ക് ബട്ടന്‍ വേണമെന്ന് ആവശ്യപ്പെട്ടിരിക്കുന്നു. ഇതിനാണ് വിദ്യാഭ്യാസം വേണമെന്ന് പറയുന്നത് എന്നായിരുന്നു മറ്റ് ചിലർ പ്രതികരിച്ചിരി ക്കുന്നത്. എല്ലാവര്‍ക്കും അവരവരുടേതായ ജീവിതമാണെന്നും പലരും നെഗറ്റീവ് കമന്‍റുമായി വരും ശ്രദ്ധിക്കേണ്ടെന്നും ചില കുറിച്ചിരിക്കുന്നു.