ജിമ്മുകളിലും പാർക്കുകളിലും പോന്നതിന് സ്ത്രീകൾക്ക് താലിബാന്റെ വിലക്ക്

കാബൂൾ: സ്ത്രീകൾ ജിമ്മുകളിലും പാർക്കുകളിലും പോകുന്നതിന് താലിബാന്റെ വിലക്ക്. ലിംഗവ്യത്യാസം പാലിക്കുന്നില്ലെന്നും ശിരോവസ്ത്രം ധരിക്കാതെയാണ് സ്ത്രീകൾ ജിമ്മുകളിലും പാർക്കുകളിലും പോകുന്നത് എന്നത് കാട്ടിയാണ് വിലക്ക്. താലിബാൻ വക്താവ് അക്കെഫ് മോഹജെറാണ് ഇക്കാര്യം കഴിഞ്ഞ ദിവസം വ്യക്തമാക്കിയത്.

കഴിഞ്ഞ 15 മാസമായി ഇതിനുവേണ്ടി ശ്രമിക്കുകയായിരുന്നു. പാർക്കുകളിലും ജിമ്മുകളിലും സ്ത്രീകൾ പ്രവേശിക്കുന്നത് പ്രത്യേക ദിവസങ്ങളിലാക്കിയ ഉത്തരവ് പാലിക്കാത്തതിനാലാണ് വിലക്കേർപ്പെടുത്തിയതെന്നും മോഹജെർ പറഞ്ഞു. വിലക്ക് ഈയാഴ്ച നിലവിൽ വരും. കഴിഞ്ഞ ഓഗസ്റ്റിൽ അഫ്ഗാനിസ്താൻ പിടിച്ചെടുത്തശേഷം സ്ത്രീകൾക്കുനേരെയുണ്ടായ അതിക്രമങ്ങൾ ചെറുതല്ല.

ഭരണമേറ്റെടുത്ത ഉടനെ ആറാം ക്ലാസ് മുതലുള്ള പെൺകുട്ടികൾക്ക് താലിബാൻ സ്കൂൾ വിദ്യാഭ്യാസം നിഷേധിച്ചിരുന്നു. ഭരണത്തിലേറുന്ന സമയത്തെ വാഗ്ദാനങ്ങൾ കാറ്റിൽപ്പറത്തി മിക്ക മേഖലകളിലും സ്ത്രീകൾ ജോലിചെയ്യുന്നതും തടഞ്ഞു. ഇതിനെതിരെ പ്രതിഷേധങ്ങൾ ഉയർന്നെങ്കിലും കാര്യമുണ്ടായില്ല.