വീട്ടമ്മ ജീവനൊടുക്കിയ നിലയില്‍, ഭര്‍ത്താവും മകനും അറസ്റ്റില്‍

കോവളം: വെള്ളാറില്‍ വീട്ടമ്മയെ ജീവനൊടുക്കിയ നിലയില്‍ കണ്ടെത്തി. കോട്ടയെ താന്നിക്കാട് മാലിയില്‍ നട്ടാശ്ശേരി പുഷ്‌കരന്റെയും ശാന്തയുടെയും മകള്‍ ബിന്ദുവാണ് തൂങ്ങി മരിച്ചത്. 46 വയസായിരുന്നു. വെള്ളാര്‍ ശിവക്ഷേത്രത്തിന് സമീപം ഇവര്‍ വാടകയ്ക്ക് കഴിയുന്ന വീട്ടില്‍ വ്യാഴാഴ്ച രാത്രിയോടെയാണ് ജീവനൊടുക്കിയത്. സംഭവവുമായി ബന്ധപ്പെട്ട് പ്രേരണാക്കുറ്റം ചുമത്തി ബിന്ദുവിന്റെ ഭര്‍ത്താവിനെയും മകനെയും കോവളം പോലീസ് അറസ്റ്റ് ചെയ്തു. 89

ബിന്ദുവിനെ ഭര്‍ത്താവും മകനും ചേര്‍ന്ന് സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. ആത്മഹത്യാ പ്രേരണാക്കുറ്റത്തിന് ബിന്ദുവിന്റെ ഭര്‍ത്താവ് അനില്‍ (48), മകന്‍ അഭിജിത്ത് (20) എന്നിവരെയാണ് പോലീസ് കസ്റ്റഡിയിലെടുത്തത്. കഴിഞ്ഞ 27 വര്‍ഷമായി കുടുംബം വെള്ളാറില്‍ വാടകയ്ക്ക് കഴിഞ്ഞ് വരികയായിരുന്നു.

നേരത്തെ ഭര്‍ത്താവിന്റെയും മകന്റെയും ഉപദ്രവത്തെ തുടര്‍ന്ന് ബിന്ദു കോവളം പോലീസ് സ്റ്റേഷനില്‍ പരാതി നല്‍കിയിരുന്നു. അന്ന് കേസ് ഒത്തുതീര്‍പ്പാക്കി. ബിന്ദുവിന്റെ എത്തിച്ചതിന് പിന്നാലെ ആശുപത്രി അധികൃതരാണ് പോലീസില്‍ വിവരം അറിയിച്ചത്. തുടര്‍ന്ന് ബിന്ദുവിന്റെ മരണത്തില്‍ ദുരൂഹത ആരോപിച്ച് സഹോദരന്‍ നല്‍കിയ പരാതിയിലാണ് അനിലിനെയും അഭിജിത്തിനെയും അറസ്റ്റ് ചെയ്തത്.

മൃതദേഹത്തില്‍ അടിയേറ്റ പാടുകള്‍ ഉണ്ടായിരുന്നതായി പൊലീസ് പറഞ്ഞു. ടൂറിസം വകുപ്പിന്റെ കോവളത്തെ ഇന്‍സ്റ്റിറ്റ്യൂട്ട് ഒഫ് ഹോട്ടല്‍ മാനേജ്‌മെന്റ് ആന്‍ഡ് കാറ്ററിംഗ് ടെക്‌നോളജിയിലെ ജീവനക്കാരനാണ് അനില്‍. പോസ്റ്റ്‌മോര്‍ട്ടം കഴിഞ്ഞ് വിട്ടുനല്‍കിയ മൃതദേഹം കോട്ടയത്തേക്ക് കാെണ്ടുപാേയതായും ഇന്ന് സംസ്‌കരിക്കുമെന്നും ബന്ധുക്കള്‍ പറഞ്ഞു.