പിറന്നാള്‍ ദിനത്തില്‍ യുവതി ഭര്‍തൃവീട്ടില്‍ മരിച്ച നിലയില്‍

പാലക്കാട്: പിറന്നാള്‍ ദിനത്തില്‍ യുവതിയെ ഭര്‍തൃവീട്ടില്‍ തൂങ്ങി മരിച്ച നിലയില്‍ കണ്ടെത്തി. വറവട്ടൂര്‍ മണ്ണേങ്കോട്ട് വളപ്പില്‍ ശിവരാജിന്റെ ഭാര്യ കൃഷ്ണപ്രഭയെയാണ് മരിച്ച നിലയില്‍ കണ്ടെത്തിയത്. 24 വയാസായിരുന്നു. ശനിയാഴ്ച രാവിലെയാണ് സംഭവം. അതേസമയം കൃഷ്ണപ്രഭയുടെ മരണത്തില്‍ ദുരൂഹത ആരോപിച്ച് ബന്ധുക്കള്‍ രംഗത്തെത്തി.

കൃഷ്ണപ്രഭയുടെ സഹോദരന്‍ ബംഗളൂരുവില്‍ ജോലി ചെയ്യുകയാണ്. സഹോദരന്‍ നാട്ടില്‍ എത്തിയ ശേഷം പോസ്റ്റ്‌മോര്‍ട്ടം ചെയ്താല്‍ മതിയെന്നാണ് പെണ്‍കുട്ടിയുടെ മാതാപിതാക്കള്‍ ആവശ്യപ്പെടുന്നത്. ഇതോടെ മൃതദേഹം പട്ടാമ്പി സര്‍ക്കാര്‍ ആശുപത്രിയിലേക്ക് മാറ്റി. ശനിയാഴ്ച തന്നെയായിരുന്നു കൃഷ്ണപ്രഭയുടെ പിറന്നാള്‍.

മൂന്ന് വര്‍ഷം മുമ്പാണ് ചെറുതുരുത്തി പുതുശ്ശേരി കുട്ടന്‍-രാധ ദമ്പതികളുടെ മകളായ കൃഷ്ണപ്രഭയും ശിവരാജും തമ്മിലുള്ള വിവാഹം നടന്നത്. ഇരുവരും സഹപാഠികളായിരുന്നു. പ്രണയിച്ച് വിവാഹിതര്‍ ആവുകയായിരുന്നു. ഇരുവരുടെയും കേസ് പോലീസിന് മുന്നില്‍ എത്തിയപ്പോള്‍ ശിവരാജിന് ഒപ്പം പോകണം എന്നായിരുന്നു കൃഷ്ണപ്രഭ പറഞ്ഞത്.

ഇതിന് ശേഷം കൃഷ്ണപ്രിയ സ്വന്തം വീട്ടില്‍ വന്നിരുന്നില്ലെന്ന് മാതാപിതാക്കള്‍ പറഞ്ഞു. ജീവനൊടുക്കുന്നതിന് മുമ്പ് കൃഷ്ണപ്രഭ അമ്മ രാധയെ ഫോണില്‍ വിളിച്ചു കരഞ്ഞുവെന്നും. പ്രശ്‌നമുണ്ടെന്ന് അറിയിച്ചതായും വീട്ടില്‍ വരണമെന്ന് ആവശ്യപ്പെട്ടതായും അവര്‍ പറഞ്ഞു. ക്ഷേത്രത്തില്‍ പോയി തിരികെ എത്തിയപ്പോഴാണ് താന്‍ മകളുടെ മരണ വിവരം അറിഞ്ഞതെന്നും രാധ പറഞ്ഞു.

എന്നാല്‍ വീട്ടില്‍ യാതൊരു പ്രശ്‌നങ്ങളും ഉണ്ടായിരുന്നില്ലെന്ന് ശിവരാജിന്റെ അമ്മ പറഞ്ഞു. എറണാകുളത്തു ജോലി സംബന്ധമായ ആവശ്യത്തിനു പോയ കൃഷ്ണപ്രഭ സംഭവം നടക്കുന്നതിന്റെ തലേദിവസം രാത്രിയാണു വീട്ടില്‍ എത്തിയത്. ഇന്നലെ രാവിലെ എഴുന്നേറ്റശേഷവും പ്രശ്‌നങ്ങളുണ്ടായില്ലെന്നും ശിവരാജിന്റെ അമ്മ പറഞ്ഞു.