അച്ഛന്‍ വഴിയരികില്‍ മരിച്ച് കിടക്കുന്നു, അടുത്തിരുന്ന് കരഞ്ഞ് തളര്‍ന്ന് ഇരട്ട കുരുന്നുകള്‍

കൊച്ചി: വഴിയരികില്‍ പിതാവിന്റെ മൃതദേഹത്തിന് അടുത്തിരുന്ന മൂന്ന് വയസുള്ള ഇരട്ടക്കുട്ടികള്‍ കരഞ്ഞത് മണിക്കൂറുകളോളം. രാത്രിയില്‍ കുട്ടികള്‍ പിതാവിന്റെ മൃതശരീരത്തിന് അഠുത്തിരുന്ന് കരയുകയായിരുന്നു. ഒടുവില്‍ പുലര്‍ച്ചെ അതുവഴി എത്തിയ പത്രവിതരണക്കാരനാണ് ആ ദാരുണ കാഴ്ച ആദ്യമായി കണ്ടത്.

കലൂര്‍ പള്ളിപ്പറമ്പില്‍ ജോര്‍ജിന്റെയും ഇടപ്പള്ളി നോര്‍ത്ത് വില്ലേജ് ഓഫിസര്‍ ലിസിമോളുടെയും ഏകമകന്‍ ജിതിന്‍ ആണ് മരിച്ചത്. 29 വയസായിരുന്നു. പിതാവ് ജോര്‍ജ് വിദേശത്താണ്. മക്കളായ ഇരട്ടക്കുട്ടികള്‍ ഏയ്ഡനും ആമ്പര്‍ലിക്കുമൊപ്പം റിസോര്‍ട്ടിലാണ് ജിതിന്‍ കഴിഞ്ഞത്. മക്കളെയും കൂട്ടി ആറ് ദിവസം മുമ്പാണ് ജിതിന്‍ വലിയ പഴമ്പിള്ളിത്തുരുത്തിലെ മാന്‍ഗ്രൂവ് റിസോര്‍ട്ടില്‍ താമസിക്കാന്‍ എത്തിയത്. റഷ്യ സ്വദേശിയായ ക്രിസ്റ്റീനയാണു ഭാര്യ.

ഗോവയില്‍ ബിസിനസ് ചെയ്ത് വരികയായിരുന്നു ജിതിന്‍. കോവിഡ് പ്രതിസന്ധി കടുത്തതോടെ നാട്ടിലേക്ക് തിരികെ എത്തി. കലൂരീല്‍ സ്വന്തം വീട് ഉണ്ടായിട്ടും കുറച്ചു കാലമായി കാക്കനാടുള്ള വാടക വീട്ടിലായിരുന്നു താമസം. ജോലി സംബന്ധമായ ആവശ്യങ്ങള്‍ക്കായി ക്രിസ്റ്റീന ബംഗളൂരുവില്‍ ആയിരുന്നു. കാക്കനാട്ടെ വീട്ടില്‍ അറ്റകുറ്റ പണികള്‍ നടക്കുന്നതിനാലാണ് ജിതിന്‍ താമസം റിസോര്‍ട്ടില്‍ ആക്കിയത്.

ഇന്നലെ പുലര്‍ച്ചെ രണ്ടരയോടെ ജിതിന്‍ മക്കള്‍ക്കൊപ്പം വാതില്‍ തുറന്നു പുറത്തേക്ക് ഇറങ്ങുന്ന സിസിടിവി ദൃശ്യങ്ങള്‍ പൊലീസിനു ലഭിച്ചിട്ടുണ്ട്. വീടു പോലെയുള്ള താമസസ്ഥലം ആയതിനാല്‍ ജീവനക്കാരൊന്നും രാത്രി ഉണ്ടായിരുന്നില്ല. ജിതിന്റെ പോസ്റ്റ്‌മോര്‍ട്ടം ഇന്നു നടത്തും. ഹൃദയാഘാതമാണ് മരണകാരണം എന്നാണു പ്രാഥമിക നിഗമനമെന്നു പൊലീസ് പറഞ്ഞു.