രാത്രി വൈകിയും ഫോൺവിളി തുടർന്നപ്പോൾ മാതാപിതാക്കൾ വഴക്കു പറഞ്ഞു, കോട്ടയത്ത് യുവാവ് തീകൊളുത്തി ജീവനൊടുക്കി

കുട്ടികളിലെ ഫോൺഉപയോ​ഗത്തിന് മാതാപിതാക്കൾ ശാസിച്ചാൽ പോയി ആത്മഹത്യ ചെയ്യുക. നമ്മുടെ കേരളത്തിലും ഇത്തരത്തിലുള്ള വാർത്തകൾ നിത്യ സംഭവമാകുന്നു. കോട്ടയത്താണ് ദാരുണമായ സംഭവം റിപ്പോർട്ട് ചെയ്തിരിക്കുന്നത്. മകൻ രാത്രി ഏറെ വൈകിയും ഫോണിൽ സംസാരിച്ചതിന് മാതാപിതാക്കൾ വഴക്ക് പറഞ്ഞു. ഇത് മാത്രമാണ് അവർ ചെയ്ത ഏക തെറ്റ്. ‌

മാതാപിതാക്കൾ വഴക്കു പറഞ്ഞതോടെ യുവാവ് വീടു വിട്ട് ഇറങ്ങുകയായിരുന്നു. പിന്നീട് കണ്ടെത്തിയത് തീകൊളുത്തി ജീവനൊടുക്കിയ നിലയിലായിരുന്നു. കോട്ടയം പെരുവ ആറാക്കൽ ജോസഫ്– ലൈസാ ദമ്പതികളുടെ മകൻ ലിഖിൽ ജോസഫ് (28) ആണ് തീകൊളുത്തി മരിച്ചത്. ഒഇഎൻ ഇന്ത്യ ലിമിറ്റഡ് ജീവനക്കാരനാണ് ലിഖിൽ.

ഇന്നലെ പുലർച്ചെ രണ്ടോടെ വീടിന്റെ മുകൾനിലയിലെ മുറിയിൽ മൊബൈൽ ഫോണിൽ സംസാരിച്ചുകൊണ്ടിരിക്കുകയായിരുന്നു ലിഖിൽ. ശബ്ദം കേട്ട് മുറിയിലെത്തിയ പിതാവ് ജോസഫ് ലിഖിലിന്റെ കൈയിൽ നിന്നു ഫോൺ പിടിച്ചുവാങ്ങുകയും ഉറങ്ങാൻ പറയുകയും ചെയ്തിരുന്നു. തുടർന്ന് വീട്ടുകാരോടു വഴക്കിട്ട് ലിഖിൽ രണ്ട് മണിയോടെ തന്നെ വീട്ടിൽ നിന്ന് ഇറങ്ങിപ്പോകുകയായിരുന്നു.

രാവിലെ അഞ്ചോടെയാണ് പെരുവ നരസിംഹസ്വാമി ക്ഷേത്രത്തിനും തടിമില്ലിനും സമീപം ദേഹമാസകലം പൊള്ളലേറ്റ നിലയിൽ ലിഖിലിനെ കണ്ടെത്തിയത്. എറണാകുളത്തെ ആശുപത്രിയിലും തുടർന്ന് കോട്ടയം മെഡിക്കൽ കോളജ് ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം കോട്ടയം മെഡിക്കൽ കോളജ് മോർച്ചറിയിൽ. സംസ്കാരം ഇന്ന് 5ന് അറുനൂറ്റിമംഗലം സെന്റ് ജോസഫ് ക്നാനായ കത്തോലിക്കാ പള്ളിയിൽ. സഹോദരങ്ങൾ: ജിഞ്ചു ജോസഫ്, ലിനു ജോസഫ്. ലിഖിൽ വീടുവിട്ടു പോയതോടെ വീട്ടുകാർ വെള്ളൂർ പൊലീസിൽ വിവരം അറിയിച്ചിരുന്നു. വീട്ടുകാരും പൊലീസും അന്വേഷിക്കുന്നതിനിടയിലാണ് യുവാവിനെ പൊള്ളലേറ്റ നിലയിൽ കണ്ടെത്തിയത്.