കടുവയോടൊപ്പം സെല്‍ഫി എടുക്കാന്‍ യുവാക്കൾ, അലറി അടുത്ത് കടുവ – വീഡിയോ വൈറൽ

വന്യമൃഗങ്ങളോടൊപ്പം സെൽഫി എടുത്ത് സോഷ്യൽ മീഡിയയിൽ പോസ്റ്റ് ചെയ്ത വൈറലാക്കാൻ ശ്രമിക്കുന്നവർ നിരവധിയാണ്. അത് പോലെ ഒരു കടുവയോടൊപ്പം ചിത്രങ്ങളെടുക്കാൻ ശ്രമിച്ച ചെറുപ്പക്കാരുടെ വീഡിയോയാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.

ചങ്ങലയിൽ ബന്ധിച്ചിട്ടുള്ള കടുവയോടൊ പ്പമുള്ള ചിത്രമെടുക്കാനാണ് ചെറുപ്പക്കാർ ശ്രമിച്ചിരിക്കുന്നത്. കടുവക്ക് തൊട്ട് പിന്നിലായിട്ടാണ് ഇവർ ഇരുവരും ഇരിക്കുന്നത്. ഇതിനിടെ കടുവയുടെ പരിശീലകൻ ഒരു വടി കൊണ്ട് കടുവയുടെ ശരീരത്തിൽ തൊടുന്നു. ഇതിൽ അസ്വസ്ഥനാവുന്ന കടുവ പെട്ടെന്ന് തിരിഞ്ഞ് അലറുകയും യുവാക്കൾ ജീവനും കൊണ്ട് ഓടുന്നതുമാണ് വീഡിയോ

കടുവയുടെ അലർച്ച കേട്ടതോടെ ഫോട്ടോ എടുക്കാൻ ഇരുന്ന ഇരുവരും പേടിച്ച് ഇറങ്ങി ഓടി. പുറത്തിറങ്ങിയ ശേഷം ചെറുപ്പക്കാരിൽ ഒരാൾ ജീവൻ രക്ഷിച്ചതിന് മുട്ടുകുത്തിയിരുന്ന് ദൈവത്തിന് നന്ദി പറയുന്നുണ്ട്. രണ്ടാമത്തെ ചെറുപ്പക്കാരൻ നിലവിളിച്ച് പുറത്തേക്കിറങ്ങി. എന്നാൽ ആദ്യമൊന്ന് അലറിയെങ്കിലും ചെറുപ്പക്കാരുടെ ഓട്ടം കണ്ട് മിണ്ടാതെ നിൽക്കുകയാണ് കടുവ. ഇതും വീഡിയോയിൽ കാണാവുന്നതാണ്.

ഈ വീഡിയോയ്ക്ക് നിരവധി പേരാണ് കമന്റുമായി എത്തിയത്. ഇവർക്ക് എന്താണ് പറ്റിയതെന്നായിരിക്കും ആ കടുവ ഇപ്പോൾ ചിന്തിക്കുന്നുണ്ടാകുക എന്നാണ് ഒരാൾ കമന്റ് ചെയ്തത്. ഏകദേശം 93000 പേരാണ് കുറഞ്ഞ സമയത്തിനുള്ളിൽ വീഡിയോ കണ്ടിട്ടുള്ളത്. മുമ്പ് മെക്‌സിക്കോയിലെ ഒരു മൃഗശാലയിൽ കടുവയെ ശുശ്രൂഷിച്ച് കൊണ്ടിരുന്ന വ്യക്തിയെ കടുവ ആക്രമിച്ചതും അന്ന് വാർത്തയായിരുന്നു.

കടുവയുടെ ആക്രമണത്തിൽ ഇദ്ദേഹത്തിന് പരിക്കേറ്റിരുന്നു. പരിക്കേറ്റ കൈ പിന്നീട് മുറിച്ച് മാറ്റേണ്ടി വരുമെന്ന് ഡോക്ടർമാർ ഇദ്ദേഹത്തോട് പറഞ്ഞിരുന്നു. എന്നാൽ അദ്ദേഹം അതിന് വിസമ്മതിച്ചിരുന്നു. ചികിത്സയ്ക്കിടെ ഹൃദയാഘാതം സംഭവിച്ചാണ് അദ്ദേഹം മരിക്കുന്നത്.