രക്ഷകനായി യൂസഫലി, ഒരു കോടി കോടതിയിൽ കെട്ടിവച്ച്‌ പ്രവാസിയെ വധശിക്ഷയിൽ നിന്നും രക്ഷിച്ച്‌ എം എ യൂസഫലി

അബുദാബി കോടതി വധശിക്ഷയ്ക്ക് വിധിച്ച ബെക്സ് കൃഷ്ണന് രക്ഷകനായി ലുലു ​ഗ്രൂപ്പ് ചെയർമാൻ എംഎ യുസഫലി. 2012 സെപ്തംബർ 7-നായിരുന്നു അബുദാബി മുസഫയിൽ വെച്ച് താൻ ഓടിച്ചിരുന്ന വാഹനം തട്ടി സുഡാൻ ബാലൻ മരിച്ചത്. ഇതുമായി ബന്ധപ്പെട്ട കേസിലായിരുന്നു തൃശ്ശൂർ പുത്തൻച്ചിറ ചെറവട്ട സ്വദേശി ബെക്‌സ് കൃഷ്ണൻ ജയിലിലാവുന്നത്

സിസിടിവി തെളിവുകളുടെയും സാക്ഷി മൊഴികളുടെയും അടിസ്ഥാനത്തിൽ കളിച്ചു കൊണ്ടിരിക്കുകയായിരുന്ന കുട്ടികളുടെ ഇടയിലേക്ക് കാർ പാഞ്ഞു കയറിയാണ് മരണം സംഭവിച്ചതെന്ന് തെളിഞ്ഞതിനാലാണ് മാസങ്ങൾ നീണ്ട വിചാരണകൾക്ക് ശേഷം യുഎഇ സുപ്രീം കോടതി 2013-ൽ ബെക്‌സിനെ വധശിക്ഷക്ക് വിധിച്ചത്. കഴിഞ്ഞ 9 വർഷമായി അബുദബി ജയിലിൽ കഴിയുകയായിരുന്നു ബെക്സ് കൃഷ്ണൻ. കുടുംബത്തിന്റെ അപേക്ഷ പരിഗണിച്ച് വ്യവസായ പ്രമുഖൻ എം എ യൂസഫലിയുടെ ഇടപെടലാണ് ഇപ്പോൾ ബെക്സിന്റെ മോചനം സാധ്യമാക്കിയത്.

അപകടത്തിൽ മരിച്ച കുട്ടിയുടെ കുടുംബവുമായി നടത്തിയ നിരന്തര ചർച്ചകളുടെയും ദിയാധനമായി ഒരു കോടി രൂപ ( 5 ലക്ഷം ദിർഹം) നൽകിയതിൻറെയും അടിസ്ഥാനത്തിലാണ് ശിക്ഷ റദ്ദ് ചെയ്യാൻ കോടതി വഴി സാധ്യമായത്. കഴിഞ്ഞ ജനുവരിയിൽ ഈ തുക എം എ യൂസഫലി കോടതിയിൽ കെട്ടിവെച്ചു. ഇനി നടപടി ക്രമങ്ങൾ പൂർത്തികരിച്ചാൽ 3 ദിവസത്തിനുള്ളിൽ ബെക്സ് കൃഷ്ണന് ജയിൽ മോചിതനാകാം.

അബൂദബി അൽ വത്ബ ജയിലിൽ കഴിഞ്ഞിരുന്ന ബെക്‌സിന്റെ മോചനത്തിനായി കുടുംബം നടത്തിയ ശ്രമങ്ങൾ ഒന്നും ഫലവത്താകാതെ സർവ്വപ്രതീക്ഷകളും തകർന്ന സമയത്താണ് ബന്ധു സേതു വഴി എം എ യൂസഫലിയോട് മോചനത്തിനായി ഇടപെടാൻ കുടുംബം അഭ്യർത്ഥിച്ചത്. കേസുമായി ബന്ധപ്പെട്ട് കുട്ടിയുടെ കുടുംബവുമായി യൂസഫലി നിരവധി തവണ ചർച്ചകൾ നടത്തുകയും കാര്യങ്ങൾ പറഞ്ഞ് അവരെ ബോധ്യപ്പെടുത്താനായതുമാണ് മോചനത്തിലേക്കുള്ള വഴി തെളിഞ്ഞത്.