കേരളത്തില്‍ 11കോവിഡ് മരണം, 3,376 പേര്‍ക്ക് കൂടി രോഗ ബാധ.

തിരുവനന്തപുരം/ കേരളത്തില്‍ ശനിയാഴ്ചയും കൊവിഡ് രോഗികള്‍ മൂവായിരം കടന്നു. കഴിഞ്ഞ 24 മണിക്കൂറിനിടെ 3,376 പേര്‍ക്ക് കേരളത്തിൽ കൊവിഡ് സ്ഥിരീകരിച്ചു. സംസ്ഥാനത്ത് ഒറ്റ ദിവസം 11 കൊവിഡ് മരണം സ്ഥിരീകരിച്ചിട്ടുണ്ട്. കോഴിക്കോടും എറണാകുളത്തും 3 പേര്‍ വീതം കൊവിഡ് ബാധിച്ച് മരിച്ചു. തിരുവനന്തപുരത്തും കൊല്ലത്തും രണ്ട് മരണവും പാലക്കാട് ഒരു മരണവും സ്ഥിരീകരിച്ചു. ശനിയാഴ്ച റിപ്പോര്‍ട്ട് ചെയ്ത 3,376 കൊവിഡ് കേസുകളില്‍ കൂടുതല്‍ കേസും എറണാകുളത്താണ്. 838 കേസുകള്‍ എറണാകുളത്തും 717 കേസുകള്‍ തിരുവനന്തപുരത്തും സ്ഥിരീകരിക്കുകയായിരുന്നു.

കോട്ടയത്ത് 399 കേസുകള്‍ 24 മണിക്കൂറിനിടെ സ്ഥിരീകരിച്ചു. അതിനിടെ ഒരു എലിപ്പനി മരണവും സംസ്ഥാനത്ത് ഇന്ന് സ്ഥിരീകരിച്ചതായി ആരോഗ്യ വകുപ്പ് അറിയിച്ചു. ഇന്നലെ 7 കൊവിഡ് മരണമായിരുന്നു സംസ്ഥാനത്ത് റിപ്പോര്‍ട്ട് ചെയ്തിരുന്നത്.

മരിച്ചവരില്‍ നാല് പേര്‍ കോട്ടയം സ്വദേശികളും മൂന്ന് പേര്‍ എറണാകുളം സ്വദേശികളുമായിരുന്നു. കഴിഞ്ഞ ദിവസം സംസ്ഥാനത്ത് 3253 കൊവിഡ് കേസുകള്‍ റിപ്പോര്‍ട്ട് ചെയ്തു. കൊവിഡ് കേസുകളില്‍ 841 എണ്ണം എറണാകുളത്തും 641 എണ്ണം തിരുവനന്തപുരത്തും 409 എണ്ണം കോട്ടയത്തുമാണ് റിപ്പോര്‍ട്ട് ചെയ്തിരുന്നത്.

അതേസമയം രാജ്യത്ത് കൊവിഡ് കേസുകള്‍ വര്‍ധിക്കുകയാണ്. ശനിയാഴ്ച 13,216 പേര്‍ക്ക് പുതുതായി കൊവിഡ് സ്ഥിരീകരിച്ചു. 24 മണിക്കൂറില്‍ 23 പേര്‍ കൊവിഡ് ബാധിച്ച് മരിച്ചു. കേരളമടക്കമുള്ള അഞ്ച് സംസ്ഥാനങ്ങളില്‍ രോഗബാധിതരുടെ എണ്ണം ഉയരുകയാണ്. രാജ്യത്ത് മൂന്ന് മാസത്തിനു ശേഷം രേഖപ്പെടുത്തുന്ന ഏറ്റവും ഉയര്‍ന്ന കണക്കാണ് ശനിയാഴ്ച രേഖപ്പെടുത്തിയത്. മരണ സംഖ്യയിലും വര്‍ധനവ് റിപ്പോർട്ട് ചെയ്തു. രോഗമുക്തി നിരക്ക് 98.63 ശതമാനമായി കുറഞ്ഞു.

പ്രതിദിന രോഗബാധിതരില്‍ 81% കേസുകളും കേരളമടക്കമുള്ള അഞ്ച് സംസ്ഥാനങ്ങളില്‍ നിന്നാണ് റിപ്പോര്‍ട്ട് ചെയ്യുന്നത് എന്ന് കേന്ദ്ര സര്‍ക്കാര്‍ വാർത്താകുറിപ്പിൽ അറിയിച്ചു. മഹാരാഷ്ട്രയിലാണ് ഏറ്റവും കൂടുതല്‍ കൊവിഡ് രോഗബാധിതരുള്ളത്. അവിടെ ഒമിക്രോണിന്റെ ഉപ വകഭേദങ്ങളാണ് നിലവിലെ രോഗവ്യാപനത്തിന് കാരണം എന്ന് സംസ്ഥാന ആരോഗ്യവകുപ്പ് പറഞ്ഞിരിക്കുന്നു. ഡല്‍ഹിയില്‍ പോസിറ്റിവിറ്റി നിരക്ക് 8 ശതമാനത്തിന് മുകളിലാണ് റിപ്പോർട്ട് ചെയ്യപ്പെട്ടിരിക്കുന്നത്.