64 മത്തെ വയസിൽ 64% വോട്ടോടെ മിന്നുന്ന വിജയം.

ഇക്കഴിഞ്ഞ ഇരുപതാം തീയതി ആയിരുന്നു ദ്രൗപദി മുർമുവിനു പ്രായം 63ൽനിന്ന് 64ലേക്കു കടന്നത്. ഗോത്ര വിഭാഗത്തിൽ നിന്ന് ഇന്ത്യയുടെ ആദ്യ പ്രസിഡന്റായി ദ്രൗപദി തിരഞ്ഞെടുക്കപ്പെടുമ്പോള്‍ അത് കുറച്ചു വൈകി കിട്ടിയ പിറന്നാൾമധുരം കൂടിയായിരുന്നു. 64 മത്തെ വയസിൽ 64% വോട്ടോടെയായിരുന്നു അവരുടെ മിന്നുന്ന വിജയം. എതിർ സ്ഥാനാർത്ഥിയായിരുന്ന യശ്വന്ത് സിൻഹയ്ക്ക് 36 ശതമാനം വോട്ടുകൾ ആണ് ആകെ ലഭിച്ചത്.

വോട്ടുമൂല്യത്തിന്റെ കണക്കുകൾ വിദഗ്ധർ പോലും പറഞ്ഞതിനെ ദ്രൗപദി മുർമു കടത്തി വെട്ടുകയായിരുന്നു. വിദഗ്ധർ വിലയിരുത്തിയിരുന്നത് ദ്രൗപദിക്ക് 61.1% വോട്ട് ഉറപ്പായും ലഭിക്കുമെന്നായിരുന്നു. വോട്ടെണ്ണിക്കഴിഞ്ഞപ്പോൾ 61.1% വോട്ട് പ്രതീക്ഷിച്ചിരുന്ന ദ്രൗപദിക്ക് 64% വോട്ടുകൾ ലഭിച്ചു. ബിജെപിക്ക് ഒരു എംഎല്‍എ പോലുമില്ലാത്ത കേരളത്തിൽനിന്ന് ദ്രൗപദിക്ക് ഒരു വോട്ടു ലഭിച്ചു.

ബിജെപിക്ക് പുറമെ വൈഎസ്ആർസിപി, ബിഎസ്‌പി, ശിരോമണി അകാലിദൾ, ശിവ സേന, അണ്ണാഡിഎംകെ, ടിഡിപി, ജെഡി(എസ്), ജെഎംഎം എന്നിങ്ങനെ എൻഡിഎയിൽ പങ്കാളിത്തമുള്ളതും ഇല്ലാത്തതുമായ പാർട്ടികളിൽനിന്നു ലഭിച്ച വോട്ടാണ് ദ്രൗപദിയെ വിജയത്തിലേക്ക് എത്തിച്ചത്.

കോൺഗ്രസ്, തൃണമൂൽ കോൺഗ്രസ്, എഎപി, എൻസിപി, ഡിഎംകെ, സിപിഎം, സിപിഐ, ടിആർഎസ്, എസ്പി, ആർജെഡി, ആർഎൽഡി, മുസ്‌ലിം ലീഗ്, കേരള കോൺഗ്രസ് (മാണി) തുടങ്ങിയ പാർട്ടികളാണ് പ്രതിപക്ഷ സ്ഥാനാർഥി യശ്വന്ത് സിൻഹയെ പിന്തുണച്ചിരുന്നത്. അവരിൽ തന്നെ പല എംപിമാരും എംഎൽഎമാരും ‘ക്രോസ് വോട്ടും’ ചെയ്യുകയുണ്ടായി. പാർലമെന്റിലെ 63–ാം നമ്പർ മുറിയിലായിരുന്നു ഭാരതത്തിൽ പുതിയ ചരിത്രം തന്നെ എഴുതി ചേർത്ത രാഷ്ട്രപതി തിരഞ്ഞെടുപ്പിന്റെ വോട്ടെണ്ണൽ നടന്നത്.