ഗുജറാത്തിൽ എഎപി എംഎൽഎമാർ ബിജെപിയിൽ ചേരുമെന്ന് സൂചന

അഹമ്മദാബാദ്. ഗുജറാത്തില്‍ വീണ്ടും എഎപിക്ക് വന്‍ തിരിച്ചടി. എഎപിയുടെ വിജയിച്ച അഞ്ച് എംഎല്‍എമാര്‍ ബിജെപിയില്‍ ചേരുമെന്നാണ് ലഭിക്കുന്ന വിവരം. ഇതിനായി എംഎല്‍എമാര്‍ നിരന്തരം ബിജെപിയുമായി ബന്ധപ്പെടുന്നുണ്ടെന്നും വിവരമുണ്ട്. തിരഞ്ഞെടുപ്പില്‍ വന്‍ വിജയം പ്രതീക്ഷിച്ച് മത്സരത്തിനിറങ്ങിയ എഎ പി പക്ഷേ പ്രതീക്ഷയ്‌ക്കൊത്ത പ്രകടനം കാഴ്ചവെയ്ക്കുവാന്‍ കഴിയാതെ നില്‍ക്കുന്ന സാഹചര്യത്തിലാണ് പുതിയ തിരിച്ചടി. 12.92 ശതമാനം വോട്ട് നേടിയ പാര്‍ട്ടിക്ക് അഞ്ച് എം എല്‍ എമാരാണ് ലഭിച്ചത്.

എഎപി ടിക്കറ്റില്‍ മത്സരിച്ച് ജയിച്ച ഭൂപത് ഭയാനി ഞായറാഴ്ച ബിജെപിയില്‍ ചേരുമെന്നാണ് ലഭിക്കുന്ന വിവരം. ജുനാഗഡ് ജില്ലയിലെ വിശ്വദര്‍ മണ്ഡലത്തില്‍ നിന്നുള്ള എ എപി എംഎല്‍എയാണ് അദ്ദേഹം. ആം ആദ്മിയുമായുള്ള ബന്ധം അവസാനിപ്പിക്കുകയാണെന്നും ബിജെപിയില്‍ ചേര്‍ന്ന് പ്രവര്‍ത്തിക്കുമെന്നും ചില മാധ്യമങ്ങളോട് എം എല്‍ എ പറഞ്ഞതായി വാര്‍ത്തകള്‍ പുറത്തുവരുന്നുണ്ട. അതേസമയം വാര്‍ത്തകള്‍ക്കെതിരെ കടുത്ത വിമര്‍ശനവുമായി എംഎല്‍എ ഭൂപത് ഭയാനി രംഗത്തെത്തി.

ബിജെപി സംസ്ഥാ നേതൃത്വം എം എല്‍ എമാരുമായി ചര്‍ച്ച നടത്തുകയാണെന്നും. ഭൂപത് ഭയാനി ഞായറാഴ്ച വാര്‍ത്ത സമ്മേളനം വിളിച്ച് ബി ജെ പിയില്‍ ചേരുന്ന കാര്യം വ്യക്തമാക്കുമെന്നുമാണ് ലഭിക്കുന്ന വിവരം. ദെദിയാപദ മണ്ഡലത്തില്‍ നിന്നും വിജയിച്ച ചൈതര്‍ വാസവ, ജംജോധ്പുരില്‍ നിന്നും വിജയിച്ച ഹേമന്ത് ബാവ, ബോട്ടാഡ് മണ്ഡലത്തില്‍ നിന്നും വിജയിച്ച ഉമേഷ് മകവാന, ഗരിയധറില്‍ നിന്നും വിജയിച്ച സുധീര്‍ വഘാനി എന്നിവരാണ് ബിജെപിയില്‍ ചേരുന്നത്.