കാപട്യമില്ലാത്ത നല്ലൊരു മനുഷ്യൻ, എന്ത് പ്രശ്നം ഉണ്ടെങ്കിലും നമുക്ക് സുരേഷേട്ടനോട് പറയാം- അഭിരാമി

സുരേഷ് ​ഗോപി നായകനായി എത്തുന്ന പുതിയ ചിത്രം റിലീസിന് ഒരുങ്ങുകകയാണ്. ‘അഞ്ചാം പാതിര’ എന്ന സൂപ്പർ ഹിറ്റ് ചിത്രത്തിന് ശേഷം മിഥുൻ മാനുവൽ തോമസ് തിരക്കഥ ഒരുക്കുന്ന ചിത്രത്തിന് ​ഗരുഡൻ എന്നാണ് പേര് നൽകിയിരിക്കുന്നത്. ബിജു മേനോനും പ്രധാന വേഷത്തിൽ എത്തുന്ന ചിത്രം നവംബറിൽ പ്രേക്ഷകർക്ക് മുന്നിലെത്തും.

സിനിമയുടെ പ്രമോഷന്റെ ഭാഗമായി നടന്ന ഒരു അഭിമുഖത്തില്‍ സുരേഷ് ഗോപിയെപ്പറ്റി അഭിരാമി പറഞ്ഞ വാക്കുകളാണ് ഇപ്പോള്‍ സമൂഹ മാദ്ധ്യമങ്ങളില്‍ ശ്രദ്ധ നേടുന്നത്. സുരേഷ് ഗോപിയുമായുള്ള ബന്ധത്തെപ്പറ്റിയുള്ള ചോദ്യത്തിനാണ് താരം ഉത്തരം നല്‍കിയിരിക്കുന്നത്. സുരേഷ് ഗോപി നല്ല ഒരു മനുഷ്യനാണെന്നും കാപട്യം തീരെ ഇല്ലെന്നും അഭിരാമി പറയുന്നു.

‘പണ്ട് എങ്ങനെയാണോ അതേപോലെ തന്നെയാണ് സുരേഷേട്ടൻ ഇന്നും. മാറ്റങ്ങളൊന്നും എനിക്ക് ഫീല്‍ ചെയ്തിട്ടില്ല. അദ്ദേഹം നല്ലൊരു സഹോദരനാണ്. സുരേഷേട്ടൻ ഒരാളെ ഇഷ്ടപ്പെടുകയാണെങ്കില്‍ അദ്ദേഹം അവരെ ആത്മാര്‍ത്ഥമായി സംരക്ഷിക്കും. എന്തെങ്കിലും പ്രശ്നം വരുകയാണെങ്കില്‍ നമുക്ക് സുരേഷേട്ടനോട് പറയാം. അദ്ദേഹം നമ്മളെ ഉറപ്പായും സഹായിക്കും. നല്ലൊരു മനുഷ്യനാണ്. ഇൻഡസ്ട്രിയുടെ ഒരു കാപട്യമൊന്നും ഇല്ലാത്ത സാധാരണക്കാരനാണ് സുരേഷേട്ടൻ. അദ്ദേഹത്തിന്റെ ചിന്താധാരകളും രാഷ്‌ട്രീയവുമെല്ലാം അദ്ദേഹത്തിന്റെ മാത്രമാണ്. അത് സുരേഷേട്ടന്റെ ഇഷ്ടമാണ്. ഒരു മനുഷ്യൻ എന്ന നിലയില്‍ അദ്ദേഹം നല്ലൊരു വ്യക്തിയാണ്’- അഭിരാമി പറഞ്ഞു.

ഒരു പൊലീസ് ഓഫീസറുടെയും കോളേജ് പ്രൊഫസറുടെയും കഥ പറയുന്ന ചിത്രമാണ് ​ഗരുഡൻ. ലീഗൽ ത്രില്ലർ മൂഡിൽ ഒരുങ്ങുന്ന ചിത്രം സംവിധാനം ചെയ്തത് അരുൺ വർമയാണ്. സിദ്ദിഖ്, ദിലീഷ് പോത്തൻ,ജഗദീഷ്, അഭിരാമി, ദിവ്യ പിള്ള, തലൈവാസൽ വിജയ്, അർജുൻ നന്ദകുമാർ, മേജർ രവി, ബാലാജി ശർമ,സന്തോഷ് കീഴാറ്റൂർ, രഞ്ജിത്ത് കങ്കോൽ, ജെയ്സ് ജോസ്,മാളവിക, ജോസുകുട്ടി,ചൈതന്യ പ്രകാശ് തുടങ്ങി നിരവധി പേർ ചിത്രത്തിന്റെ ഭാ​ഗമാകുന്നുണ്ട്. മാജിക്‌ ഫ്രെയിംസ് ആണ് നിര്‍മാണം.