സിനിമയില്‍ ക്രിസംഘിയായിട്ടാണോ ചേട്ടാ, നടന്‍ സംഘിയും കഥാപാത്രം ക്രിയാണ്; മാസ് മറുപടിയുമായി കൃഷ്ണകുമാര്‍

ഏഷ്യാനെറ്റില്‍ സംപ്രേഷണം ചെയ്ത കൂടെവിടെയിലൂടെയായിരുന്നു കൃഷ്ണകുമാര്‍ മിനിസ്‌ക്രീനില്‍ തിരിച്ചെത്തിയത്. വര്‍ഷങ്ങള്‍ക്ക് ശേഷമുള്ള തിരിച്ചുവരവില്‍ ആരാധകരും സന്തോഷത്തിലായിരുന്നു. ആദിയെന്ന കഥാപാത്രത്തെയായിരുന്നു അദ്ദേഹം അവതരിപ്പിച്ചിരുന്നത്. മാസങ്ങൾക്ക് മുൻപായി പരമ്പരയില്‍ നിന്നും ആ കഥാപാത്രം അപ്രത്യക്ഷമാവുകയായിരുന്നു. അതോടെയായിരുന്നു ആരാധകര്‍ അന്വേഷിച്ച് തുടങ്ങിയത്. കൂടെവിടെയെക്കുറിച്ച് ചോദിച്ചവർക്ക് കൃഷ്ണകുമാർ നൽകിയ മറുപടി വൈറലായിരുന്നു.

തന്നെ പരമ്പരയില്‍ നിന്നും പുറത്താക്കിയെന്നും ഇനി കൂടെവിടെയില്‍ കാണാന്‍ സാധ്യത ഇല്ലെന്നുമായിരുന്നു കൃഷ്ണകുമാറിന്റെ മറുപടി. പരമ്പരയില്‍ താനിനി ഇല്ല, കാരണം കൃത്യമായിട്ടറിയില്ല, എഴുത്തുകാരനെ മാറ്റി. അവര്‍ കഥ മാറ്റിയിരിക്കണം. അവരുമായി ബന്ധത്തിലല്ലെന്നായിരുന്നു കൃഷ്ണകുമാറിന്റെ മറുപടി. അടുത്ത പരമ്പരയ്ക്കായി കാത്തിരിക്കുകയാണ് തങ്ങളെന്നായിരുന്നു ആരാധകർ പറഞ്ഞത്.പിന്നീട് ധാരാളം സിനിമയില്‍ അദ്ദേഹമെത്തി, വൈകാതെ രാശ്ട്രീയത്തിലും അദ്ദേഹം സജീവ സാന്നിധ്യമായി.

സോഷ്യല്‍ മീഡിയയിലൂടെയുമായും അദ്ദേഹം വിശേഷങ്ങള്‍ പങ്കിടാറുണ്ട്. കള്ളന്‍ ഡിസൂസയെന്ന ചിത്രത്തില്‍ സുപ്രധാന വേഷത്തില്‍ കൃഷ്ണകുമാറും എത്തുന്നുണ്ട്. ജോര്‍ജ് എന്ന കഥാപാത്രത്തെയാണ് അദ്ദേഹം അവതരിപ്പിക്കുന്നത്. ചിത്രം തിയേറ്ററുകളിലേക്കെത്തുന്ന സന്തോഷം പങ്കുവെച്ച് അദ്ദേഹം എത്തിയിരുന്നു. നാളെ റിലീസിന് തയ്യാറായിരിക്കുന്ന കള്ളന്‍ ഡിസൂസയില്‍ ഞാന്‍ ചെയ്ത കഥാപാത്രം ജോര്‍ജ് എന്നായിരുന്നു കൃഷ്ണകുമാര്‍ ഫേസ്ബുക്കില്‍ കുറിച്ചത്.

നിരവധി പേരാണ് അദ്ദേഹത്തിന്റെ പോസ്റ്റിന് താഴെയായി കമന്റുകളുമായെത്തിയത്. എല്ലാവിധ ഭാവുകങ്ങളും നേരുന്നു, ചിത്രം വന്‍വിജയമായിത്തീരട്ടെ. സംഘിയായ നിങ്ങള്‍ ക്രിസ്ത്യാനിയായി അഭിനയിച്ചോ, നിങ്ങളുടെ കാര്യം കട്ടപ്പൊകയെന്നായിരുന്നു ഒരാളുടെ കമന്റ്. ഈ കമന്റിന് ക്രിസംഘി എന്നായിരുന്നു കൃഷ്ണകുമാറിന്റെ മറുപടി. ക്രിസംഘിയായിട്ടാണോ അഭിനയിച്ചതെന്ന് ചോദിച്ചപ്പോള്‍ കഥാപാത്രം ക്രിയാണ് നടന്‍ സംഘിയും എന്നായിരുന്നു കൃഷ്ണകുമാറിന്റെ മറുപടി. ഇനിയും ഒരുപാട് അവസരങ്ങള്‍ തേടിയെത്തട്ടെയെന്നായിരുന്നു ആരാധകരുടെ കമന്റുകള്‍.